Այսօր`հուլիսի 18-ին ստորագրվեց համագործակցության պայնագիր Հայփոստի եւ ՀՀ ՊԵԿ-ի միջեւ, ըստ որի «ՀայՓոստ»-ի վերանորոգված և արդիականացված բաժանմունքներում ստեղծվում են հարկ վճարողների սպասարկման կետեր, որտեղ աշխատելու են ՊԵԿ ներկայացուցիչներ: Պայմանագիրը ստորագրեցին ՀՀ ՊԵԿ նախագահ Գագիկ Խաչատրյանը, <Հայփոստ Թրասթ Մենեջմենթ>-ի գլխավոր տնօրեն Խուան Պաբլո Գեչիջյանը, <Հայփոստ> ՓԲԸ գործադիր տնօրենի պաշտոնակատար Հայկ Ավագյանը:
Խուան Պաբլո Գեչիջյանի խոսքով` Հայփոստը եւ ՊԵԿ-ը համընթաց քայլ են կատարում աշխարհում ընթացող գործընթացների հետ, քանի որ օր-օրի ավելանում է ինտերնետ- վաճառքների քանակը եւ այս պայմանագիրը հնարավորություն է տալիս ավելի արդիական սպասարկում իրականացնել հայփոստի բաժանմունքներում: Գագիկ Խաչատրյանն իր խոսքում ընդգծեց, որ Հայփոստի ցանցի օգտագործմամբ, ՊԵԿ-ը ինքն է գնում դեպի բնակչությունը, ավելի հասանելի դառնալով հարկ վճարողների համար:
Հայփոստում ՊԵԿ ներկայացուցիչների հիմնական գործառույթներն են լինելու էլեկտրոնային եղանակով հաշվետվությունների ներկայացման, հարկերի, տուրքերի և այլ վճարումների հետ կապված հարցերին օժանդակումը, ինչպես նաև հարկային և մաքսային վարչարարության, օրենսդրության հետ կապված հարցերի պարզաբանումը: Իսկ սպասարկման կետերում տեղադրված տերմինալների միջոցով ՊԵԿ ներկայացուցիչների աջակցությամբ հարկ վճարողները կարող են նաև հարկային հաշվարկներ ու հաշվետվություններ ներկայացնել:
Նախատեսվում է նաև, տեխնիկական հնարավորությունների դեպքում, առանձին փոստային բաժանմունքներում իրականացնել փոստային առաքանիների արտահանման և ներմուծման հետ կապված մաքսային ձևակերպումներ և մաքսազերծում: Այս նախաձեռնության առանձնահատկություններից մեկն այն է, որ հարկ վճարողները հնարավորություն կունենան նույն վայրում միաժամանակ օգտվել ինչպես ՊԵԿ, այնպես էլ «ՀայՓոստ»-ի ծառայություններից: Այսպիսով, սպասարկման կետերի քանակի և աշխարհագրական տեղաբաշխվածության ընդլայնումը թույլ կտա այդ ծառայություններից օգտվող հարկ վճարողներին խնայել բավականին ժամանակ և միջոցներ:
Այս համագործակցությունը համահունչ է «Հայփոստ Թրասթ Մենեջմենթ»-ի ստրատեգիական ծրագրերին: Մինչեւ 2013թ. ավարտը «Հայփոստ»-ի նորոգված բաժանմունքների թիվը ողջ հանրապետությունում կանցնի 200-ից: Միաժամանակ 2013թ. «Հայփոստ Թրաստ Մենեջմենթ»-ը կիրականացնի խոշոր փոստային եւ կոմերցիոն ծրագրեր «Լա Փոստի», «Փոստե Իտալիանեի» և «Պոչտա Ռոսսիի« հետ: Կիրականացվեն փոստային առաքանիների լոգիստիկ պրոցեսների վերակազմավորում, արագ դրամական փոխանցումների նոր համակարգերի ներդրում, ծրագրային լուծումների նոր համակարգերի ներդրում, ավտոմեքենաների շարժակազմի թարմացում, փոստբանկային ծառայությունների ներդրում, կատալոգային վաճառքների ընդլայնում եւ այլն:
Հայփոստ ՓԲԸ հավատարմագրային կառավարիչ Հայփոստ Թրաստ Մենեջմենթի 2013 թ.-ի ծրագրով շարունակվում է ՀՀ փոստային կապի ազգային օպերատորի արդիականացման եւ զարգացման լայնամասշտաբ ծրագիրը, որի համաձայն մինչեւ տարեվերջ նախատեսվում է արդիականացնել եւ նոր ստանդարտներին համապատասխանեցնել 60 փոստային բաժանմունք եւ մասնաճյուղ: Ըստ նոր ծրագրի, 8 փոստային բաժանմունք կարդիականացվի Երեւանում, 52-ը`մարզերում:
Հայփոստ Թրասթ Մենեջմենթ-ն առանձնակի ուշադրություն է դարձնում մարզերում Հայփոստ-ի պատշաճ ներկայությանը, փոստային և հարակից ծառայություների զարգացմանը:
Հայփոստ Թրասթ Մենեջմենթը մտադիր է Հայաստանի Հանրապետությունում զարգացնել ավանդական փոստային ծառայությունները, ներդնել ավելի ժամանակակից սուրհանդակային, ֆինանսական եւ կոմերցիոն ծառայություններ` Հայփոստը դարձնելով ազգային առաջատար փոստային օպերատոր տարածաշրջանում:
ՀԱՅԵՐԵՆ
Русский
English
Դաս. հայերեն
French
