ՀՀ փոխվարչապետ, տարածքային կառավարման նախարար Արմեն Գեւորգյանն ընդունել է Համաշխարհային բանկի պատվիրակությանը
13-12-2013 13:08:53 | Հայաստան | Տնտեսություն
ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Համաշխարհային բանկի (ՀԲ) պատվիրակությանը` ՀԲ Եվրոպայի եւ Կենտրոնական Ասիայի տարածաշրջանի կայուն զարգացման ոլորտի ղեկավար Ահմեդ Էյվեյդայի (Ahmed Eiweida) գլխավորությամբ:
Հյուրերը փոխվարչապետին տեղեկացրեցին Երկրի գործընկերության ռազմավարության շրջանակում նախատեսվող տարածքների զարգացման ծրագրի նախնական ուղղությունների մասին` դրանց վերաբերյալ կարեւորելով ՀՀ կառավարության եւ ոլորտային նախարարության մոտեցումները: Նշվեց, որ հիմնականում շեշտը դրվելու է հարավային մարզերում զբոսաշրջության զարգացման վրա, ինչը ներառելու է ենթակառուցվածքների, ՓՄՁ-ների զարգացում, հնարավորություն է տալու ներդրումներ ներգրավել: Ծրագրի նախագծի վրա ներկայումս աշխատում է նաեւ ՀԲ փորձագիտական թիմը:
Փոխվարչապետ նշելով, որ ծրագիրը համահունչ է կառավարության կողմից որդեգրված տարածքների համաչափ զարգացման քաղաքականությանը, կարեւորեց տեղական ինքնակառավարման համակարգի բարեփոխումների համատեքստում դրա իրականացումը: Անդրադառնալով բաղադրիչներին` նա մասնավորապես առաջարկեց հարավային մարզերում զբոսաշրջային միջանցքի զարգացման ուղղությունից բացի, մյուս մարզերի համար եւս նպատակային ծրագրեր նախատեսել, որոնք կունենան կոնկրետ տարածքում զբոսաշրջության զարգացմանը նպաստող նշանակություն: Որպես օրինակ նշվեց Դիլիջան քաղաքի հատակագծի պատրաստման աշխատանքների իրականացումը, ինչը կարեւոր է քաղաքի հետագա զարգացման համար:
ՏԿՆ հասարակայնության հետ կապերի բաժնից հայտնում են, որ կողմերի քննարկեցին նաեւ ծրագրի մեկնարկի ժամկետների, ֆինանսավորման հետ կապված հարցեր: