ԳԴՀ արտակարգ և լիազոր դեսպան Ռայներ Մորելին պարգևատրվել է «Ոսկե ծիրան» կինոփառատոնի հոբելյանական մեդալով

Մարտի 6-ին «Ոսկե ծիրան» միջազգային կինոփառատոնի գլխավոր տնօրեն

Հարություն Խաչատրյանը Գերմանիայի Դաշնային Հանրապետության

արտակարգ և լիազոր դեսպան Ռայներ Մորելին հանձնեց կինոփառատոնի՝

2013թ. նշված տասնամյակի հոբելյանական մեդալը: «Ոսկե ծիրան»-ի

ներկայացուցիչները՝ ծրագրերի տնօրեն Միքայել Ստամբոլցյանը և

գեղարվեստական ղեկավար Սուսաննա Հարությունյանը Հարություն

Խաչատրյանի հետ միասին գերմանական կողմին շնորհակալություն հայտնեցին

կինոփառատոնին ցուցաբերած աջակցության համար:

«Ոսկե ծիրան» միջազգային կինոփառատոնի և Գերմանիայի միջև

համագործակցությունը սկսվել է դեռևս 2004թ.՝ փառատոնի մեկնարկային

տարում, և շարունակվել է ամեն տարի: Գերմանիայի դեսպանությանն այս

գործում մեծապես աջակցել է Գյոթեի անվան ինստիտուտը, որի հայաստանյան

ներկայացուցիչ Յուլիա Կրամերը նույնպես ներկա էր մեդալի հանձնման

արարողությանը:

«Ոսկե ծիրան»-ին մինչ օրս մասնակցել են տարբեր ժանրերի ավելի քան 120

գերմանական ֆիլմեր, այդ թվում՝ Մարգարեթ ֆոն Թրոտտայի «Հաննա Արենդթը»,

Վիմ Վենդերսի «Պինան» և Ֆաթիհ Աքինի “Soul Kitchen”-ը: Այս երեք ռեժիսորները,

ինչպես նաև գերմանական կինոյի շատ այլ գործիչներ տարբեր տարիներին

հյուրընկալվել են «Ոսկե ծիրան»-ին: 2014թ. նույնպես ակնկալվում է

գերմանական մասնակցություն կինոփառատոնին:

Գերմանիայի դեսպանությունը մեծ ուրախությամբ է նպաստում «Ոսկե ծիրան»

միջազգային կինոփառատոնի կայացմանը և նրա անձնակազմին մաղթում է 2014

թվականի հերթական փառատոնի հաջող անցկացում:

Նոյյան տապան - Մշակույթ