Հայաստանի ԿԲ-ի խորհուրդը որոշեց վերաֆինանսավորման
տոկոսադրույքը դարձյալ բարձրացնել 0,5%-ով` սահմանելով այն 7%
13-04-2010 20:32:00 | Հայաստան | Տնտեսություն
ԵՐԵՎԱՆ, 13 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի Կենտրոնական
բանկի խորհուրդը ապրիլի 13-ի նիստում որոշել է վերաֆինանսավորման
տոկոսադրույքը բարձրացնել 0,5%-ով` սահմանելով այն 7%: Նշենք, որ
ԿԲ-ի խորհուրդը մինչ այդ` մարտի 9-ին, իսկ դրանից առաջ` փետրվարի
16-ին, վերաֆինանսավորման տոկոսադրույքը դարձյալ բարձրացրել էր
0,5-ական տոկոսով` սահմանելով այն համապասխանաբար 6,5% եւ 6%:
Ըստ ՀՀ ԿԲ-ի Հասարակայնության հետ կապերի ծառայության,
2010թ.-ի մարտին նախորդ ամսվա նկատմամբ արձանագրվել է 0,8% գնաճ,
որի պարագայում 12-ամսյա գնաճի ցուցանիշը նախորդ ամսվա նույն
ցուցանիշի նկատմամբ նվազել է 0,6 տոկոսային կետով` կազմելով 8,8%:
Խորհուրդը փաստել է, որ համաշխարհային տնտեսության
վերականգնման դրական միտումների եւ հակաճգնաժամային միջոցառումների
ներքո իրականացված ընդլայնողական դրամավարկային եւ
հարկաբյուջետային քաղաքականության պայմաններում տնտեսական աճի
տեմպերը գերազանցում են կանխատեսված ցուցանիշը: Արդյունքում, ներկա
գնաճային միջավայրը ձեւավորվել է հիմնականում վերոնշյալ գործոնների
ազդեցության ներքո, ինչը համապատասխանում է ԿԲ-ի կողմից նախանշված
ուղղություններին:
Խորհրդի գնահատմամբ, ձեւավորված մակրոտնտեսական միջավայրի եւ
ապրիլից հիմնական կոմունալ ծառայությունների թանկացման
պայմաններում կանխատեսվող հորիզոնում գնաճային միջավայրը դեռեւս
կպահպանվի, թեեւ 12-ամսյա գնաճի նվազման արձանագրված միտումները
կշարունակվեն:
Հաշվի առնելով վերոնշյալը, խորհուրդը շարունակում է կարեւորել
գնաճի սպասվող զարգացումներին համահունչ դրամավարկային պայմանների
աստիճանական խստացումը` ուղղված դրական իրական տոկոսադրույքների
ձեւավորմանը: Վերջինս, կառավարության կողմից հակագնաճային
միջոցառումների իրականացման հետ զուգահեռ, իրատեսական նախադրյալներ
կստեղծի գնաճը նպատակային միջակայք վերադարձնելու համար: