Հոկտեմբերի 7-ին բացվեց  ԱՄՆ Հայ կրթական հիմնարակության կողմից Հայաստանում, Արցախում եւ Ջավախքում 182 նորոգված դպրոցներից մեկը՝ Լոռու մարզի Դարպաս գյուղի միջնակարգ դպրոցը: 

 

Դպրոցի բացման հանդիսավոր արարողությանը ելույթ ունեցավ Լոռու մարզպետ Արթուր Նալբանդյանը, ով շնորհակալություն հայտնեց այն բոլոր բարերարներին, որոնց շնորհիվ հնարավոր դարձավ վերանորոգել դպրոցը: «21-րդ դարում կան շատ մարդիկ, ովքեր ունեն մեծ ֆինանսական հնարավորություններ, բայց ոչ բոլորն են պատրաստ հրաժարվել իրենց գումարներից եւ նվիրատվություն անել: Ու թեեւ այս մարդիկ միլիոնատերեր չեն ու չունեն մեծ միջոցներ,  բայց իրենց փոքրիկ լումայով կարողացել են մեզ սատարել  ու այսօր շնորհիվ նրանց բարերարության Դարպասի դպրոցը վերանորոգված է»,- ասաց Լոռու մարզպետը:

 

Լոռու մարզի դպրոցաշինության գործում ունեցած մեծ ավանդի համար Հայ կրթական հիմնարկությունը պարգևատրվեց Լոռու մարզպետի հուշամեդալով, որը շնորհվեց հիմնարկության խորհրդի նախագահ Ալ Քաբրալովին: 

Ինչպես տեղեկացրեց դպրոցի տնօրեն Սերյոժա Գուրջանյանը, դպրոցն ունի ավելի քան  100 տարվա պատմություն: «Դարպասի դպրոցը հիմնադրվել է 1912 թվականին: 1984-ին դպրոցում սովորում էր 390 աշակերտ, այժմ ունենք 203 աշակերտ: Իհարկե, այս թիվը մեզ չի գոհացնում, և մենք ձգտելու ենք հասցնել աշակերտների թիվը նախկին թվաքանակին»,- ասաց Ս. Գյուրջանյանը:

 

Հայ կրթական հիմնարկության հայաստանյան գործերով տնօրեն Նշան Փիրումյանը համառոտ ներկայացրեց կազմակերպության  գործունեությունը. «2000 թվականին` մեր հիմնարկության հիմնադրման 50-ամյակին, որոշեցինք 50 դպրոց վերանորոգել Հայաստանի սահմանամերձ շրջաններում: Պետք է ուրախությամբ փաստեմ, որ այս դպրոցն արդեն 182-րդն է, որ վերանորոգվում է: Մինչ այժմ վերանորոգել ենք 60 դպրոց Արցախում, 10-ը` Ջավախքում, 112-ն էլ Հայաստանի Հանրապետության տարածքում, որից 31-ը Լոռու մարզում»,- տեղեկացրեց նա, միաժամանակ նշելով, որ նորոգված դպրոցներին նաև համակարգիչներ են նվիրում, իսկ աշակերտներին գրենական պիտույքներ ու պայուսակներ: «Բացի դպրոցաշինությունից, մենք նաև կրթաթոշակ ենք տրամադրում Հայաստանի և Արցախի համալսարանների ուսանողներին: Այս տարի ունենք 80 կրթաթոշակառու, ում բոլոր տարիների ուսման վարձը տրամադրում ենք»,- նշեց Նշան Փիրումյանը:

 

Հանդիսավոր արարողության սկզբում հյուրերին դիմավորեցին աղ ու հացով, իսկ արարողության ավարտին դպրոցի աշակետները հանդես եկան փոքրիկ համերգային ծրագրով:

 

 

 

 

 

 

 

Միջոցառման լուսանկարներն այստեղ

Նոյյան տապան  -   Բարեգործություն