Ավարտվել է հանրապետական ուսանողական մարզական խաղերի աղջիկների բասկետբոլի առաջնությունը։

11-10-2014 16:19:22 | Հայաստան | Սպորտ

Հոկտեմբերի 10-ին ավարտվեց հանրապետական ուսանողական մարզական խաղերի աղջիկների բասկետբոլի առաջնությունը։ Մասնակցում էր բուհական 8 թիմ։ Եզրափակիչ փուլում ուժերը չափեցին լավագույն 4 թիմերը. 3-րդ տեղի համար պայքարում էին Բրյուսովի անվան պետական լեզվահասարակագիտական և Երևանի պետական համալսարանների աղջիկները։ Երրորդ հորիզոնականը զբաղեցրեց ԵՊՀ թիմը։

Առաջին հորիզոնականի համար պայքարում հանդիպեցին նախորդ տարիների անփոփոխ չեմպիոն Հայ-ռուսական (Սլավոնական) համալսարանի հավաքականը և ֆիզիկական կուլտուրայի հայկական պետական ինստիտուտի նորաստեղծ թիմը։ Թեժ պայքարում ընդամենը 4 միավորի տարբերությամբ հաջողության հասավ ֆիզիկական կուլտուրայի հայկական պետական ինստիտուտի թիմը։ 2-րդ հորիզոնականում սլավոնականի աղջիկներն էին։

Հոկտեմբերի 13-ից արդեն կմեկնարկեն բասկետբոլի տղաների մրցումները։

Հայաստանի ուսանողական մարզական 15-րդ խաղերը կազմակերպել են ՀՀ կրթության և գիտության նախարարությունը, Հայաստանի ուսանողական մարզական ֆեդերացիան և Հայաստանի երիտասարդական հիմնադրամը։

Ուսանողական խաղերի բոլոր հաղթողները տարվա վերջին Հայաստանի երիտասարդական հիմնադրամի կողմից ծաղկաձորյան հանգստի ուղեգրեր կստանան։

Հայաստանի երիտասարդական հիմնադրամի

հասարակայնության հետ կապերի ծառայություն

Նոյյան տապան - Սպորտ