Ըստ ՀՀ վարչապետի, հայ-թուրքմենական բարիդրացիական քաղաքական հարաբերությունները պահանջում են նաեւ տնտեսական հիմք
08-04-2010 14:48:00 | Հայաստան | Տնտեսություն
ԵՐԵՎԱՆ, 8 ԱՊՐԻԼԻ, ՆՈՅՅԱՆ ՏԱՊԱՆ: Հայաստանի վարչապետ Տիգրան
Սարգսյանը ապրիլի 8-ին ներկա է գտնվել Հայաստանի եւ Թուրքմենստանի
միջեւ տնտեսական համագործակցության միջկառավարական հանձնաժողովի
երկրորդ նիստի շրջանակներում կազմակերպված ցուցահանդես-վաճառքի
բացման արարողությանը:
Ըստ ՀՀ կառավարության Տեղեկատվության եւ հասարակայնության հետ
կապերի վարչության հաղորդագրության, մինչ այդ վարչապետը
առանձնազրույց է ունեցել հայ-թուրքմենական տնտեսական
համագործակցության միջկառավարական հանձնաժողովի համանախագահ Խըդըր
Սափարալիեւի հետ:
Իր ողջույնի խոսքում Տ.Սարգսյանը մասնավորապես նշել է.
«Գաղտնիք չէ, որ վերջին շրջանում մեր փոխհարաբերությունները
դինամիկ զարգանում են: Դրանք հիմնված են ավանդույթների վրա, որոնք
մենք պարտավոր ենք պահպանել, զարգացնել եւ խորացնել: Դրան նպաստում
է նաեւ միջկառավարական հանձնաժողովի նիստը, որը մենք անցկացնում
ենք Երեւանում, ինչպես նաեւ այսօրվա ցուցահանդեսի բացումը: Դա
հնարավորություն է, որպեսզի հայ սպառողը եւս ծանոթանա այն
ապրանքներին, որոնք այսօր լայն տարածում ունեն ողջ աշխարհում եւ
որոնք արտահանում են մեր թուրքմեն բարեկամները: Վերջին տարիներին
Թուրքմենստանի տնտեսությունը զարգանում է բավական բարձր տեմպերով,
եւ նկատվում է կայուն աճ, հատկապես թեթեւ եւ տեքստիլ
արդյունաբերությունում: Այդ փորձն, իհարկե, հետաքրքիր է մեզ համար:
Նաեւ շատ կարեւոր է հասկանալ` ինչպիսի ապրանքներ, ինչպիսի որակ են
ապահովում այդ ձեռնարկությունները: Այստեղ փոխադարձ
շահագրգռվածություն կա: Մենք պարոն Սափարալիեւի հետ քննարկել ենք
հարցեր, որոնք կարող են փոխադարձ հետաքրքրություն ներկայացնել:
Արձանագրեցինք նաեւ, որ ակնհայտ է, որ բարիդրացիական քաղաքական
հարաբերությունները, որոնք ձեւավորվել են մեր երկրների միջեւ,
պահանջում են նաեւ տնտեսական հիմք, տնտեսական ամրապնդում: Այստեղ
գոյություն ունի բավականին լուրջ չօգտագործված ներուժ, եւ մեր
կառավարությունները պետք է գործադրեն բոլոր անհրաժեշտ ջանքերը,
որպեսզի տնտեսական փոխհարաբերությունները մեր երկրների միջեւ
խորանան եւ ընդլայնվեն: Դրա վառ վկայությունն այսօրվա ցուցահանդեսն
է, որտեղ կարելի է տեսնել ապրանքների մի ամբողջ հավաքածու, որոնք
կարող են փոխադարձ հետաքրքրություն ներկայացնել»:
Տ.Սարգսյանը վստահություն է հայտնել, որ այն բոլոր
պայմանավորվածությունները, որոնք ձեռք կբերվեն միջկառավարական
հանձնաժողովի նիստի շրջանակներում, կնպաստեն երկու երկրների
բարեկամական հարաբերությունների ամրապնդմանը»: