ԼՈՆԴՈՆ, 12 ՄԱՐՏԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Բրիտանական
հեղինակավոր "Էկոնոմիստ" (The Economist) պարբերականը մարտի 12-ին
«Բախվելով պատմությանը» խորագրով մի հոդված է հրապարակել, որտեղ
անդրադարձել է Հայոց ցեղասպանության միջազգային ճանաչման խնդրին:
Ըստ թերթի, Հայաստանը բազմիցս բարձրացնում է Առաջին
աշխարհամարտի տարիներին տեղի ունեցած ողբերգությունը ճանաչելու
հարցը, Թուրքիան զայրանում է, իսկ Միացյալ Նահանգների
կառավարությունը փորձում է հնարավորինս մեղմել կորուստները:
«Թուրքիայում հակահայկական տրամադրություններ են տիրում,
շատերը կասկածում են, որ Օբաման հավատարիմ կմնա իր կարծիքին (որն
ասել է 2008 թվականին սենատոր եղած ժամանակ` «Հայոց
ցեղասպանությունը ոչ թե սոսկ պնդում է, այլ լայնորեն հիմնավորված
փաստ»), ու արդյունքում կրկին կիրագործվի դիվանագիտական ծեսը»,-
գրում է թերթը: Այնուհետեւ «Էկոնոմիստի» մեկնաբանը հարց է
բարձրացնում, թե արդյոք այս դրամայի մասնակիցներից որեւէ մեկը
կարող է բարելավել սցենարն ու հավելում է. «Ինչ-որ թուրք առաջնորդ
երբեւէ կհասկանա, որ ազգային արժանապատվությունն ավելի լավ
կարտահայտվի այն դեպքում, երբ կխոստովանվեն Անատոլիական հողերում
իրականացված մեղքերը, այլ ոչ այն ժամանակ, երբ հալածում ու պատժում
են ճշմարտությունն ասողներին»: «Հայերի համար իրենց նախնիների
ճակատագրի ընդունումը սուրբ գործ է: Դժվար թե նրանք մոռանան իրենց
դաժան հիշողությունները, եւ դժվար թե համաձայնեն, թե իբր 1915
թվականի իրադարձությունների գնահատականը ոչ թե քաղաքական
գործիչների, այլ գիտնականների ու պատմաբանների գործն է»,- նշում է
պարբերականը: