Բողոքի ակցիա` ի պաշտպանություն խաղաղ պայմաններում զոհված զինծառայողների մայրերի. (Տեսանյութեր եւ ֆոտոշարք)
20-05-2015 14:30:59 | Հայաստան | Հասարակություն
«Զինվորը պիտի լինի պաշտպանված», «Պահանջում ենք սպանությունների արդար քննություն», «Ամեն զինվոր իմ որդին է» պաստառներով մի խումբ քաղաքացիներ եւ հասարակական կազմակերպությունների ներկայացուցիչներ մայիսի 20-ին նախագահական նստավայրի առջև իրականացրեցին բողոքի ակցիա: Նրանք պահանջում էին պատժել այն ոստիկաններին, ովքեր օրեր առաջ ՀՀ նախագահի նստավայրի առջևից ուժի գործադրմամբ հեռացրել էին բողոքող զոհված զինծառայողների մայրերին:
Բողոքի ակցիային մասնակցող հասարակական կազմակերպությունները տեղում կազմակերպեցին ստորագրահավաք` նախագահից բանակային սպանությունները բացահայտելու և մայրերի վրա ձեռք բարձրացրած ոստիկաններին պատժելու պահանջով:
Ստորագրահավաքին մասնակցեցին տարբեր ՀԿ-ների ներկայացուցիչներ և բազմաթիվ անցորդներ:
Ակցիային մասնակցեցին նաև Ազգային Ժողովի ՀԱԿ խմբակցության պատգամավորներ Արամ Մանուկյանն ու Լևոն Զուրաբյանը:
Վերջինս լրագրողների հետ զրույցում նշեց, որ իրենք մինչև վերջ լինելու են մայրերի կողքին: Ըստ Լ. Զուրաբյանի` խաղաղ պայմաններում զոհված զինծառայողների մայրերն ունեն իրավունք բողոքելու: Նա նկատեց, որ բանակում հաճախ են լինում սպանություններ, որոնք չեն բացահայտվում ու որակվում են որպես ինքնասպանություն:
Արամ Մանուկյանը տեղեկացրեց, որ ակտիվիստները չեն սահմանափակվելու բողոքի ակցիաներով, այլ մայրերի հետ քննարկելուց հետո դիմելու են նաև միջազգային ատյաններին: