Կայացել է 4-ամյա Հակոբ Հակոբյանի  բուժումն արտասահմանում իրականացնելու համար «Օգնենք հայ մանուկներին» բարեգործական հասարակական կազմակերպության նախաձեռնած բարեգործական համերգը, որի ամբողջ հասույթը կազմել է  500 հազար ՀՀ դրամ:

 

Երեխայի մոտ ախտորոշվել է «Սուր պիելոնեֆրիտ, երկկողմանի միզապարկ միզածորանային հետհոսք աջից չորրորդ, ձախից երրորդ աստիճան, խրոնիկական երիկամային հիվանդություն երրորդ շրջան, միզապարկի դիվերտիկուլ, վիճակ հետին միզուկի կափույրի տրանսուրետրալ ռեզեկցիայից հետո»: Նրան անհապաղ անհրաժեշտ է մանրամասն հետազոտություններ, միզուղիների վիրահատություն, իսկ հետագայում նաև երիկամի փոխպատվաստում, որը հնարավոր է իրականացնել եվրոպական երկրներում, մասնավորապես Շվեդիայում։ Հովհ. Թումանյանի անվան պետական տիկնիկային թատրոնում համերգը սկսվել է ժողովրդական երաժշտությամբ՝ Ավագ Մարգարկանի և իր ընկերների կատարումներով, ապա հաջորդել է ԻնՌոք խումբի և երգչուհի Լուսինե Ազարյանի կատարումները: Համերգը եզրափակել են Միրզոյան Կվարտետի ջութակահարները. հնչել է Մոցարտ, ապա Կոմիտաս: 

Համերգին ներկա է եղել նաև փոքրիկ Հակոբը: 

«Օգնենք հայ մանուկներին» ՀԲԿ անդամները համերգի կայացման, աջակցության և վստահության համար շնորհակալություն են հայտնել բոլոր մասնակից երաժշտական խմբերին և անհատ կատարողներին, Հովհ. Թումանյանի անվան պետական տիկնիկային թատրոնի տնօրինությանը և արդեն հարազատ դարձած հանդիսատեսին:

 

Էլիզա Զախարյան, «Նոյյան Տապան»

Նոյյան տապան  -   Բարեգործություն