Ստյոպա Սաֆարյանի պնդմամբ` հոսանքի թանկացման դեմ սկսված շարժումը չպետք է արժեզրկել
07-07-2015 15:11:45 | Հայաստան | Հասարակություն
Էլեկտրաէներգիայի թանկացման դեմ ծավալված քաղաքացիական շարժումն ըստ քաղաքական վերլուծաբան Ստյոպա Սաֆարյանի` չպետք է արժեզրկել «քանի որ այն աննախադեպ էր ու այնքան հզոր, որ ստիպեց ՀՀ նախագահին արձագանքել և մեկ քայլ հետ անել»:
Ինչպես այսօր «Նոյյան տապան» լրատվական գործակալության մամուլի սրահում լրագրողների հետ հանդիպման ժամանակ նշեց Ս. Սաֆարյանը, ներկայիս երիտասարդությանը հաջողվեց քնից արթնացնել ողջ ժողովրդին և հավատացնել, որ «Մենք ենք տերը մեր երկրի»:
Ըստ նրա` կոտրվեց այն կարծրատիպը, թե ռուսն է մեր փրկիչը կամ առանց ռուսների ոչինչ չենք կարող անել, իսկ հասարակությունը գնաց այդ նոր գաղափարի հետևից:
Ս. Սաֆարյանի համոզմամբ` հոսանքի թանկացման դեմ սկսված շարժումը ցույց տվեց, որ Հայաստանում քաղաքական դաշտը մեռած է. «Այս բողոքի ալիքը պետք է առաջին հերթին քաղաքական ընդդիմությունը բարձրացներ, այլ ոչ թե հասարակությունը»:
Նրա կործիքով` Բաղրամյան պողոտան ի վերջո մեկ օր բացվելու էր, քանի որ չկար նոր քայլերի և գործողությունների ձեռնարկման հստակ ծրագիր:
Ըստ վերլուծաբանի` հասարակության գաղափարական պառակտման պատճառ դարձավ ՀՀ նախագահ Սերժ Սարգսյանի հայտարարությունն` ի պատասխան Բաղրամյան պողոտայում նստացույց իրականացնող ցուցարարներին:
«Ըստ էության նախագահի ելույթը պահանջի բավարարում չէր, այլ խնդրի լուծման այլընտրանքային ճանապարհ, հետևաբար Բաղրամյանում հավաքվածների թիվը պետք է կրկնապատկվեր ու եռապատկվեր, որպեսզի նոր թափով հնարավոր լիներ ճնշում գործադրել», ասաց Ս. Սաֆարյանը:
Վերջինիս կարծիքով` էլեկտրաէներգիայի թանկացման դեմ սկսված շարժման մասնակիցները և համակարգողներն արդեն պետք է բարձրացնեն աուդիտի մեթոդաբանության հարցը. «Այս փուլում շատ կարևոր է շարժման մասնակիցների, հասարակության մասնագիտական խմբերի և ԶԼՄ-ների ներկայացուցիչների ակտիվությունը և ներգրավածությունն աուդիտի գործընթացում, քանի որ դրանից է մեծամասամբ կախված աուդիտի ընթացքն ու արդյունքը»:
Միաժամանակ քաղաքական վերլուծաբանը գտնում է, որ փողոցային պայքարը կշարունակվի: