Ավրորա Մարդիգանյանի անվան հուշամեդալով պարգեւատրվեցին «Ոսկե ծիրան»-ի հիմնադիրն ու բարեկամները.տեսանյութեր
15-07-2015 20:27:57 | Հայաստան | Մշակույթ
«Ոսկե ծիրան» 12-րդ միջազգային կինոփառատոնի շրջանակներում փառատոնի կազմակերպիչները, հյուրերը հուլիսի 15-ին այցելեցին Հայոց ցեղասպանության թանգարան ինստիտուտ, որտեղ Հայոց ցեղասպանության թանգարան ինստիտուտի տնօրեն Հայկ Դեմոյանը անցկացրեց պարգեւատրման հանդիսավոր արարողություն:
Հ. Դեմոյանը լրագրողների հետ զրույցում նշեց, որ թանգարանը թողարկում է «Երախտագիտություն» խորագրով ոսկե մեդալների շարքը, որոնք նվիրված են տարբեր երախտավորների: «Սա հուշանվերմեդալ է, որը թանգարանի կողմից մենք հանձնում ենք մեր այցելուներին, աջակիցներին և բարեկամներին: Իսկ այս մեկն Ավրորա Մարդիգանյանի անվան հուշամեդալ է կոչվում», ասաց Հայկ Դեմոյանը: Տեղեկացնենք, որ Հայոց ցեղասպանության թանգարան ինստիտուտի տնօրեն Հայկ Դեմոյանը Ավրորա Մարդիգանյանի անվան հուշամեդալներով պարգևատրեց «Ոսկե ծիրան» փառատոնի հիմնադիր, գլխավոր տնօրեն, կինոռեժիսոր Հարություն Խաչատրյանին, «ՎիվաՍելՄՏՍ»ի գլխավոր տնօրեն Ռալֆ Յիրիկյանին, կինոռեժիսոր Ռոբ Նիլսոնին, բարերարներ՝ Պավել Մարգարյանին և Խաչիկ Մանուկյանին, թուրք մտավորական, գործարար Օսման Կավալային:
Լրագրողների հետ զրույցում «Ոսկե ծիրան» փառատոնի հիմնադիր, գլխավոր տնօրեն Հարություն Խաչատրյանը նշեց, որ նման մրցանակները հանձնվում են այն մարդկանց, որոնք օգնել են կազմակերպել Հայոց ցեղասպանության 100-րդ տարելիցին նվիրված «Այլևս երբեք» ծրագիրը, որի շրջանակում տարբեր երկրներում ներկայացվել են ցեղասպանության մասին ֆիլմեր: «Մարդիկ և՛ ֆինանսապես, և՛բարոյապես օգնել են մեզ ծրագիրն իրագործելու համար: Եղեռնի մասին ֆիլմերը շատ ավելի հասկանալի են, քան խոսքը: Այս տարի մենք լավ գործ արեցինք, աշխարհի տասնյակ երկրներում ցուցադրեցինք Եղեռնի մասին ֆիլմեր, մարդիկ հասկացան, թե ինչ ցավ ունի հայ ժողովուրդը: Շնորհակալություն նրանց, ովքեր մեզ օգնեցին»,-նշեց Հարություն Խաչատրյանը: