Չինաստանի կինոթատրոններում առաջին անգամ թույլատրվել է ցուցադրել միասեռականների մասին պատմող ֆիլմ
03-09-2015 17:25:27 | Չինաստան | Մշակույթ
Երկու տղամարդկանց միջև եղած սիրո մասին պատմող Seek McCartney ֆիլմը Չինաստանում ստացել է վարձակալության թույլտվություն: Այս մասին գրում է lenta.ru-ն` վկայակոչելով The Hollywood Reporter-ին:
Սա միասեռականների հարաբերությունների մասին պատմող առաջին կինոժապավենն է, որը թույլատրվել է ազատորեն ցուցադրել երկրի կինոթատրոններում: Ակնկալվում է, որ ֆիլմը կցուցադրվի առաջիկա ձմռանը, սակայն պրեմիերայի համար կոնկրետ ամսաթիվ առայժմ չի նշվում: Տեղեկացվում է, որ ֆիլմի ստեղծման վրա համատեղ աշխատել են չինացի և ֆրանսիացի պրոդյուսերները:
Ֆիլմի ռեժիսոր Վանգ Չաոն տեղի իշխանությունների կայացրած որոշումը համարել է «փոքր քայլ կինոքննադատների և մեծ քայլ կինոգործիչների համար»:
Ֆիլմում նկարահանվել է չինացի հայտնի երգիչ Հան Գենը և ֆրանսիացի դերասան Ջերեմի Էլկեմը: Չինաստանի իշախանություններն առայժմ չեն մեկնաբանել իրավիճակը: Հայտնի է, որ այս տարվա սկզբին հրաժարվել են վարձակալել մեկ այլ «Փակուղի» ֆիլմը, որում կա երկու տղամարդկանց համբուրվելու տեսարան:
Չինաստանը չի օգտագործում վարկանիշային համակարգը, հետևաբար տեղի կինոթատրոններում հանդիսատեսը կարող է առանց տարիքային սահմանափակման դիտել ցանկացած ֆիլմ: Հենց այս պատճառով էլ Չինաստանում միասեռ ամուսնությունների մասին պատմող ժապավենների ցուցադրություններն արգելված են:
ՀԱՅԵՐԵՆ
Русский
English
Դաս. հայերեն
French
