ՀՕՖ-ը շարուակում է աջակցել սահմանամերձ դպրոցներին

18-09-2015 16:37:31 | Տավուշի մարզ | Բարեգործություն

Սեպտեմբերի 17-ին ու 18-ին Տավուշի մարզի Բերդ քաղաքի ու հարակից սահմանամերձ գյուղերի դպրոցներում 3 մարզահրապարակ, 1 մարզադաշտ, երկու դասասենյակ պաշտոնապես հանձնվել են աշակերտներին:

Հայ օգնության ֆոնդի (ՀՕՖ) 2013-ին մեկնարկած «Աղքատության հաղթահարումը Տավուշի մարզում» 5-ամյա ծրագրի կրթական բաղադրիչի շրջանակներում վերանորոգված կամ կառուցված, նոր գույքով հագեցած մարզահրապարակներն ու դասասենյակները ավելի լավ պայմաններ են ստեղծում Բերդի տարածաշրջանի ավելի քան 1000 դպրոցականի համար:

ՀՕՖ-ի ծրագրի շրջանակներում արդեն ավելի քան 10 դպրոց ու մանկապարտեզ է աջակցություն ստացել: Այս տարի նրանց թիվը մեծանալու է արդեն տեղ ունեցած աշխատանքների շնորհիվ:

Մասնավորապես, Բերդի թիվ 1 դպրոցում վերանորոգվել ու նորովի կահավորվել է Ռազմագիտության դասասենյակը, որը անվանվել է ազատամարտիկ Վահան Բաղդասարյանի հիշատակին: Վահանը 10-րդ դասարանում զոհվել է հակառակորդի կրակից՝ պաշտպանական դիրքեր զինամթերք մատակարարելու ժամանակ:

«Ես հպարտ եմ, որ իմ որդին զոհվել է չքնաղ Տավուշի պաշտպանության դիրքերում: Իմ միակ ցանկությունը խաղաղությունն է: Շնորհակալ եմ իմ որդու հիշատակը հարգելու եւ նրա անվամբ Բերդի թիվ 1 դպրոցի ռազմագիտության դասասենյակը անվանակոչելու համար», -դասասենյակի բացմանը նշեց Վահանի մայրը՝ Անահիտ Բաղդասարյանը:

Նախկինում ՀՕՖ-ի միջոցներով վերակառուցվել էր նաեւ Բերդի թիվ 1 դպրոցի մարզահրապարակն ու ֆիզկուլտուրայի դահլիճը: Դպրոցին տրամադրվել էր նաեւ անհրաժեշտ սպորտային գույք:

Մարզահրապարակ եւ սանհանգույց է կառուցվել նաեւ Ներքին Կարմիրաղբյուր գյուղի դպրոցում: Վերակառուցվել է Պառավաքար գյուղի մարզահրապարակը, ֆինանսական աջակցություն է ցուցաբերվել դպրոց խմելու ջրագիծ անցկացնելու համար:

Միանգամայն նոր մարզադաշտ է կառուցվել ու խոտածածկով ապահովվել Բերդի ավագ դպրոցում: Քաղաքի թիվ 4-րդ դպրոցում վերանորոգվել ու մասնակի կահավորվել է խոհանոցը, սեղանի թենիսի սենյակը: Կառուցվել է նոր սան. հանգույց: Գեղեցիկ, նոր ու հարմարավետ բասկետբոլի եւ ֆուտբոլի մարզադաշտ է կառուցվել Բերդի 3 դպրոցի աշակերտների համար:

Նոյյան տապան - Բարեգործություն

Կարդացել են 995 անգամ

ՀՕՖ-ը շարուակում է աջակցել սահմանամերձ դպրոցներին

Noyan Tapan TV