Մաքուր տեխնոլոգիաների բիզնես գաղափարների ազգային մրցույթի հաղթողները կստանան 10 հազար ԱՄՆ դոլար դրամաշնորհ
12-10-2015 18:51:41 | Հայաստան | Գիտություն եւ տեխնոլոգիաներ
Հայաստանում հոկտեմբերի 12-13-ն անցկացվող մաքուր տեխնոլոգիաների բիզնես գաղափարների ազգային մրցույթի եզրափակիչ փուլ անցած 24 թիմեր երկու օրվա ընթացքում 5 հոգուց բաղկացած հանձնաժղովին ներկայացնելու են իրենց բիզնես գաղափարները, որոնցից միայն չորսն են հաղթող ճանաչվելու:
Ինչպես «Նոյյան Տապանի» թղթակցի հետ զրույցում տեղեկացրեց ՄԱԿ-ի արդյունաբերական զարգացման կազմակերպության (ՄԱԱԶԿ) կողմից իրականացվող «Հայաստանում մաքուր տեխնոլոգիաների գլոբալ ինովացիոն ծրագիր ՓՄՁ-ների համար» ծրագրի ղեկավար Մարեկ Դրայեկը, մրցույթում հաղթած 4 թիմերից միայն մեկն է ճանաչվելու ազգային հաղթող:
Նրա փոխանցմամբ` հաղթողներից յուրաքանչյուրին շնորհվելու է 10 հազար ԱՄՆ դոլար դրամաշնորհ իրենց տեխնոլոգիաների նախատիպերը մշակելու համար, իսկ ազգային հաղթողը ստանալու է նաև հավելյալ ֆինանսավորում` մասնակցելու Cleantech Open-ի 2015 թվականի նոյեմբերի 19-21-ին Սիլիկոնյան հովտում կայանալիք գլոբալ բիզնես ֆորումին և ներկայացնելու իր բիզնես մոդելը վենչուրային հիմնադրամներին, ներդրողներին և մաքուր տեխնոլոգիաների ոլորտի փորձագետների:
«Հայաստանում կան աշխարհի լավագույն բիզնես գաղափարները, սակայն դրանց հեղինակները չունեն բավարար հմտություններ դրանք շուկա դուրս բերելու և իրական բիզնեսի վերածելու համար»,- ասաց Մ. Դրայեկը` հավելելով, որ վերոնշյալ ծրագրի շրջանակներում փորձելու են լրացնել այդ բացը:
Հայաստանն Արևելյան Եվրոպայի երկրներից առաջինն է, որը միացել է ՄԱԿ-ի արդյունաբերական զարգացման կազմակերպության կողմից իրականացվող և Գլոբալ էկոլոգիական հիմնադրամի կողմից ֆինանսավորվող «Մաքուր տեխնոլոգիաների գլոբալ ինովացիոն ծրագիր ՓՄՁ-ների համար» ծրագրին:
Մ. Դրայեկի խոսքերով` վերոնշյալ ծրագիրն իրականացվում է նաև Հարավային Աֆրիկայում, Հնդկաստանում, Պակիստանում, Թուրքիայում, Մալազիայում և Թաիլանդում:
Տեղեկացվեց, որ մրցույթին մասնակցելու հայտ ներկայացրած 46 բիզնես գաղափարներից (թիմերից) կիսաեզրափակիչ փուլ են անցել 30-ը, որոնցից 24-ն ավարտել են 10-շաբաթյա հատուկ ակսելերացիոն դասընթացներ` մրցունակ բիզնես մոդելներ մշակելու համար: Դրանք ընդգրկում են վերականգնվող էներգիայի, էներգախնայողության, թափոնից ստացման և ջրային ռեսուրսներ և խնայողություն ոլորտները:
ՀԱՅԵՐԵՆ
Русский
English
Դաս. հայերեն
French
