Բարի գործը բումերանգի էֆեկտ ունի. ինչ տաս, այն էլ կստանաս (տեսանյութ)
17-02-2016 18:57:56 | Հայաստան | Հասարակություն
Հասարակությունը հիվանդ է, եթե այնտեղ բարությունը քիչ է. բարության ինքնաբուխ արտահայտման միջազգային օրվա կապակցությամբ փետրվարի 17-ին «Նոյյան Տապանում» հրավիրված մամլո ասուլիսի ժամանակ հայտարարեց Տեր Կարապետ քահանա Կարապետյանը: Ըստ նրա, հավատով մարդը միշտ բարին է արարում և Աստծո նմանողությամբ ստեղծված լինելով, ձգտում է Տիրոջը նմանվել:
«Բարի գործը բումերանգի էֆեկտ ունի. եթե մեկին մի օր լավություն ես անում, ապա որոշ ժամանակ անց տասնապատիկը քեզ հետ է վերադառնում»,- իր խոսքում նշեց Տեր Կարապետը:
«Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը ներկայացնելով միջազգային հետազոտությունների տվյալները` փաստեց, որ ամենից շատ բարեգործություններ կատարող 180 երկրների շարքում Հայաստանը 119-րդն է , իսկ հյուրասեր լինելու ցուցանիշով` 40-րդ հորիզոնականում: Նրա համոզմամբ, բարեգործություն անելու ժողովրդի պատրաստակամությունը բնակչության սոցիալական վիճակով չէ որ պայմանավորված է: «Երկրներ կան, որոնց մեկ շնչին բաժին ընկնող համախառն ներքին արդյունքը (ՀՆԱ) բազմապատիկ անգամ ցածր է Հայաստանի ՀՆԱ-ից, սակայն բարեգործությամբ նրանք առաջին հոորիզոնականներում են»,- նշեց Ա. Ադիբեկյանը` հավելելով, որ բարեգործություն կատարելու համար գումար ունենալուց առավել կարևոր ցանկությունն է:
Ա. Ադիբեկյանի կարծիքով, ՀՀ օրենսդրությունը չի աջակցում բարեգործությանը` բարեգործություն անող մարդկանց հարկերից չազատելով: Ըստ նրա, արտերկրում բարեգործություն անող մարդը հարկեր չի մուծում, իսկ «այստեղ ասում են բարոգործություն ես ուզում անել քո գրքպանից արա»:
Ա. Ադիբեկյանը նշեց նաև, որ այսօր Հայաստանում գերխնդիր է մի սերունդ մեծացնել, որը պատրաստ կլինի բարեգործություն անելուն:
Հոգեբան Աննա Բադալյանի պնդմամբ, հայ էթնոսի բնավորության գծում մեծ տեղ է գրավում բարությունը և դրա մասին են վկայում հայերենում մի շարք բառակապակցությունների առկայությունը, ինչպիսիք են բարի լույս, բարի օր, բարին ընդ ձեզ,բարին արա ջուրը գցիր, բարև: Նրա փոխանցմամբ, հայ երիտասարդների հոգում բարին իր ուրույն տեղն ունի, սակայն բարեգործություն կատարելու մշակույթը Հայաստանում դեռ ձևավորման փուլում է: Նա նաև փաստեց, որ բարեգործություն անել չի նշանակում անպայման ինչ-որ մեկին գումար տալ, բարեգործություն է համարվում նաև կամավորական աշխատանքով հասարակությանն օգնելն ու սեփական գիտելիքները ուրիշների հետ կիսելը:
«Արշակ Դաբաղյանի անվ Մայր Մանե» սոցիալական ՀԿ-ի նախագահ Մանուշակ Ստեփանյանը հայերի բարեգործություն անելու ունակությունն այդքան էլ չի թերագնահատում: Մ. Ստեփանյանը երկու տարի է, ինչ առնչվում է օգնության կարիք ունեցող մարդկանց հետ և փաստում է, որ միշտ էլ գտնվում են մեծահոգի մարդիկ, ովքեր անշահախնդրորեն իրենց օգնությունն են ցուցաբերում: Նրա տեղեկացմամբ, մի շարք հայտնի և անհայտ բարեգործների շնորհիվ հաջողվել է 60 երեխայի բժշկական օգնություն ցուցաբերել: «Ես չգիտեմ, թե մենք աշխարհում բարեգործությամբ որ տեղն ենք զբաղեցնում , բայց ես իմ գործունեության ընթացքում այնքան բարգործների եմ հանդիպել, այնքան օգնող ձեռքեր եմ տեսել, որ պարզապես հիացած եմ»:
Մ. Ստեփանյանը կարևորեց նաև հեռուստատեսության դերն ու նշանակությունը բարության տարածման գործում և կոչ արեց «հեռուստատեսության եթերից մաքրել երեխայի մեջ չարություն սերմանող բոլոր աղբերը»:
ՀԱՅԵՐԵՆ
Русский
English
Դաս. հայերեն
French
