Աճում է զանգվածային անկարգությունների պատճառով հարեւան Սիրիայից Թուրքիա փախստականների հոսքը: Ըստ թուրքական ԶԼՄ-ների, փախստականների թիվը հասնում է մի քանի հազարի: Սիրիայի սահմանի մոտ գտնվող Հաթայ գավառում սիրիացի փախստականների համար ստեղծվել է ժամանակավոր վրանային ճամբար, բոլորին տրամադրվում են բժշկական պարագաներ, ջուր, սնունդ:
Թուրքիայի նախագահ Աբդուլահ Գյուլը հայտարարել է, թե Թուրքիան պատրաստ է Սիրիայում բոլոր հնարավոր բացասական սցենարների զարգացմանը։ «Մենք ձեռնարկել ենք համապատասխան միջոցառումներ, այդ թվում տարածքներ փախստականների համար»,- ասել է նա:
Թուրքական իշխանությունները կոչ են արել Սիրիային դադարեցնել ճնշումները բողոքի ակցիաների մասնակիցների նկատմամբ եւ թույլ տալ արտասահմանյան մամուլի ներկայացուցիչների մուտքը երկիր: Անցած շաբաթ Դամասկոս է ուղարկվել թուրքական պատվիրակություն Սիրիայի կառավարության հետ քաղաքական եւ տնտեսական բարփոխումներ իրականացնելու հարցերի շուրջ քննարկումներ անցկացնելու նպատակով: