Աշոտ Արծրունու «Հայ ժողովրդի պատմությունը» հասել է Իսպանիա,
Արգենտինա եւ Ուրուգվայ
18-05-2010 12:30:00 | Արգենտինա | Քաղաքական
ԲՈՒԵՆՈՍ ԱՅՐԵՍ, 18 ՄԱՅԻՍԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ:
Իսպանիայում, Արգենտինայում եւ Ուրուգվայում ներկայացվել է Աշոտ
Արծրունու (Արծրունի Թալյան) հեղինակած «Հայ ժաղովրդի պատմության»
գրքի իսպաներեն վերահրատարակությունը: Գիրքը ներկայացվել է
Արգենտինայի Բորգեսի մշակութային կենտրոնում, Կորդոբայում,
Մոնտեվիդեոյում եւ Կոստա Դորադո կատալոնական զբոսաշրջության հայտնի
կենտրոնում գտնվող Սալոու ծովափնյա քաղաքում:
Ինչպես նշել է գրքի իսպաներենով վերահրատարակման հարցում մեծ
ներդրում ունեցած հայ ազգի մեծ բարեկամ, իսպանացի հայտնի գրող Խոսե
Անտոնիո Գուռիարան, Իսպանիայում այս գրքի վերահրատարակումը շատ
սպասված էր նաեւ Արգենտինայում: Քարտեզներով ու պատկերներով
հարուստ այդ աշխատությունը միակ իսպաներեն լեզվով գիրքն է, որը
ներկայացնում է հայոց պատմությունն ամբողջությամբ: Որպես ներածական
խոսք գրքում զետեղված է աշխարհահռչակ Վիլյամ Սարոյանի տարիներ առաջ
թղթին հանձնած անխախտ այն համոզմունքը, թե «Երբ աշխարհի ցանկացած
վայրում երկու հայ միանում են իրար, այնտեղ մի նոր Հայաստան է վեր
խոյանում»:
Գիրքը գրվել է դեռեւս 1965թ.: Ինչպես գրում է
tribunaarmenia.com-ը, Թալյանը ծնվել է Հայաստանում, այնուհետեւ
որոշ հանգամանքներից ելնելով, ապաստանել է Արգենտինայում, որտեղ եւ
ղեկավարել է Բուենոս Այրեսի «Հայաստան» շաբաթաթերթը: