Յաիր Օրոն. «Ժխտելով Հայոց ցեղասպանությունը` Իսրայելը
դավաճանում է Հոլոքոստի զոհերի հիշատակը»
21-04-2010 18:38:00 | Ֆրանսիա | Հասարակություն
ՓԱՐԻԶ, 21 ԱՊՐԻԼԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Ժխտելով Հայոց
ցեղասպանությունը` Իսրայելը դավաճանում է Հոլոքոստի զոհերի
հիշատակը. Փարիզում անցկացվող «Հայաստան-Թուրքիա. ինչպես
կարգավորել հարաբերությունները» գիտաժողովում ելույթ ունենալով`
ասել է իսրայելցի պրոֆեսոր Յաիր Օրոնը:
Ըստ նրա, Իսրայելը երկակի չափորոշիչներով է առաջնորդվում. մի
կողմից` պայքարում է Հոլոքոստի ժխտման դեմ, մյուս կողմից` ոչ միայն
հերքում է Հայոց ցեղասպանությունը, այլեւ իր ավանդն է բերում այդ
պատմական փաստի ժխտման գործին: «Ապագայում դա վնաս կհասցնի հենց
Հոլոքոստի ճանաչմանը»,- համարում է պրոֆեսորը:
«Յուրաքանչյուր ոք կհամաձայնի, որ Իսրայելն իրավունք չունի
առեւտրի առարկա դարձնել Հոլոքոստը: Ավելին, նա իրավունք չունի ոչ
մի պարագայում նույնը անել մեկ այլ երկրի նկատմամբ: Իսկ Իսրայելը
իրեն հենց այդպես է պահում Հայոց ցեղասպանության հարցում»,- ասել է
Օրոնը` անդրադառնալով նաեւ 2007, 2008, 2009 թվականներին Կնեսետում
Ցեղասպանության թեմայով քննարկումներին: Դրանք բոլորը ձախողվել են,
եւ պրոֆեսորի կարծիքով` նույնը սպասվում է նաեւ այս տարի,-
տեղեկացնում է «Երկիրը»: