Երեխաների պաշտպանության օրվա կապակցությամբ Երևանում անցկացվեց նաև Մանկության Աշխարհ EXPO 2016-ը
08-06-2016 14:56:50 | Հայաստան | Կազմակերպություններ
Ավելի քան 50 հայաստանյան ընկերություններ հունիսի 4-6-ը Yerevan EXPO ցուցահանդեսային համալիրում ՄԱՆԿՈՒԹՅԱՆ ԱՇԽԱՐՀ EXPO 2016-ի այցելուներին ծանոթացրեցին փոքրիկներին ուղղված բոլոր ապրանքների ու ծառայությունների հետ: Երեխաների պաշտպանության միջազգային օրվան նվիրված 10-րդ հոբելյանական միջազգային մասնագիտացված ցուցահանդեսում ներկայացված էր միայն փոքրիկների համար նախատեսված հագուստ, կոշիկ, խաղալիքներ, գրասենյակային և դպրոցական պարագաներ, քաղցրավենիք, պաղպաղակ, զարգացնող և ուսուցանող խաղեր, կրթօջախներ, ուսումնական ձեռնարկներ և գրքեր, բժշկություն երեխաների համար, ատրակցիոններ և այլն:
ՄԱՆԿՈՒԹՅԱՆ ԱՇԽԱՐՀ EXPO-ն այն բացառիկ ցուցահանդեսներից է, որի ընթացքում այցելուները պարզապես չեն ծանոթանում ապրանքների և ծառայությունների հետ, այլ ականատես են լինում հետաքրքիր և ուրախ միջոցառումների` հենց մանուկների մասնակցությամբ:
Ցուցահանդեսի փոքրիկ այցելուներին ուրախացնելու և զվարճացնելու համար համերգային ծրագրով հանդես եկավ «Գլորիա» պարային համույթը, իսկ ծաղրածուն ու տաղավարներով շրջող մուլտհերոսներն իսկական տոն մատուցեցին այցելուներին:
Եռօրյա ցուցահանդեսին մասնակցում էին հրատարակչություններ, զարգացման կենտրոններ և մանկատներ. վերջիններս ներկայացրեցին երեխաների ձեռքի աշխատանքները:
Նշենք, որ LOGOS EXPO Center -ն առաջին մասնավոր ցուցահանդեսային ընկերությունն է Հայաստանում, որը գործում է 1999 թվականից և առաջատար է համարվում արդյունաբերական, տեղական և միջազգային ցուցահանդեսների ու կոնգրեսների կազմակերպման գործում։