«Անօդաչու թռչող սարքեր» մրցույթի հաղթողներն արժանացել են համապատասխանաբար 600 000, 400 000 և 260 000 դրամ պարգևավճարի
04-07-2016 18:29:17 | Հայաստան | Գիտություն եւ տեխնոլոգիաներ
Հայտնի են անօդաչու թռչող սարքերի մրցույթի հաղթող թիմերը. Դրանք երեքն են` «Fimetech», «ArmBGC», «TSD»: Արզնի օդանավակայանի տարածքում հուլիսի 2-ին կայացած մրցույթի ընթացքում վերջիններիս հաջողվել է կատարել մրցույթի պահանջները, այն է՝ հասնել նպատակակետ, նետել 300 գրամանոց բեռն ու վերադառնալ մեկնարկի կետ: Ինֆորմացիոն տեխնոլոգիաների ձեռնարկությունների միության (ԻՏՁՄ) և Ucom ընկերության աջակցությամբ անցկացվող «Անօդաչու թռչող սարքեր» մրցույթում 1-ին, 2-րդ և 3-րդ տեղերը զբաղեցրած վերոնշյալ թիմերը կազմակերպիչների կողմից արժանացել են 600 000, 400 000 և 260 000 դրամ պարգևավճարի:
Ինչպես լրագրողների հետ զրույցում նշեց Ucom ընկերության տնօրեն Հայկ Եսայանը, «Անօդաչու թռչող սարքեր» մրցույթը ոլորտում առաջին քայլեր կատարելու տեսանկյունից է շատ կարևոր, քանի որ փորձ է արվում երկրում զարգացնել ռազմարդյունաբերությունը, իսկ իրենց ընկերությունը պատրաստ է մշտապես աջակցել նմանատիպ գործունեություն ծավալող թիմերին:
«Ապրիլյան դեպքերը ցույց տվեցին, որ մենք նմանատիպ նախագծերի ու մրցույթների կարիքն իսկապես շատ ունենք և ես կրկնակի ուրախ եմ, որ ԻՏՁՄ-ի հետ համատեղ նախաձեռնությունը սկսել ենք ավելի վաղ, ինչը նշանակում է, որ մենք վտանգը միշտ գիտակցել ենք»,- ասաց նա` հավելելով, որ Հայաստանն այս առումով ճիշտ ուղու վրա է:
Հ. Եսայանի խոսքերով` թիմերի կատարած աշխատանքը և ճկուն միտքը թույլ է տալիս հավատալու, որ այս ոլորտը երկրի ապագան է, իսկ երիտասարդները պատրաստ են այն զարգացնելու:
«ԱրմՌոբոտիքս» ռոբոտաշինության զարգացման ծրագրի շրջանակում իրականցվող «Անօդաչու թռչող սարքեր» մրցույթին մասնակցում էին նաև «Epic Dron», «iUAV», «Eagle Eye», «Sky protectors», «Արծիվ», «Սավառնակ» և «ՌոբոԷջմիածին» թիմերը:
ԻՏՁՄ գործադիր տնօրեն Կարեն Վարդանյանի տեղեկացմամբ` «ԱրմՌոբոտիքս» ռոբոտաշինության զարգացման ծրագրի նպատակն է զարգացնել ռոբոտաշինության ոլորտը Հայաստանում, ինչպես նաև հանրայնացնել ռոբոտաշինության նկատմամբ հետաքրքրությունը, բացահայտել, խրախուսել տաղանդավոր հայ դպրոցականներին ու երիտասարդներին, ովքեր կարող են մեծ ավանդ ունենալ ՀՀ ռազմարդյունաբերության ու տեխնոլոգիական զարգացման գործում:
Միջոցառմանը մասնակցում էին նաև ՀՀ Պաշտպանության նախարարի տեղակալ Դավիթ Փախչանյանը, ՊՆ Ռազմական ավիացիոն ինստիտուտի պետ, գնդապետ Դանիել Բալայանը, մասնագիտական ժյուրիի անդամները և այլ հյուրեր:
ՀՀ Պաշտպանության նախարարի տեղակալ Դավիթ Փախչանյանի գնահատմամբ` մրցույթում ներկայացված սարքերը բավականին լուրջ կառուցվածք ունեն և կարող են լավ օրինակ հանդիսանալ ռազմաարդյունաբերության ոլորտի զարգացման գործում:
Վերջինս կարևորեց նաև հանրակրթական դպրոցներում ռոբոտաշինական խմբակների և ինժեներական լաբորատորիաների ավելացման գործընթացը, որն ըստ նրա` հնարավորություն է տալիս դպրոցահասակ երեխաների մեջ հետաքրքրվածություն սերմանել դեպի տեղեկատվական տեխնոլոգիաների ոլորտը:
Հիշեցնենք, «ԱրմՌոբոտիքսի» շրջանակում ԻՏՁՄ-ն և Ucom ընկերությունը հայտարարել էին «Ական փնտրող ռոբոտներ» և «Անօդաչու թռչող սարքեր» մրցույթների մեկնարկի մասին դեռևս 2015 թվականի նոյեմբերին: «Ական փնտրող ռոբոտներ» մրցույթի եզրափակիչը կայացել էր ապրիլին, որտեղ, ի դեպ, կրկին առաջին տեղ էր զբաղեցրել «Ֆայմթեք» ընկերությունը:
ՀԱՅԵՐԵՆ
Русский
English
Դաս. հայերեն
French
