Ծանրամարտի Եվրոպայի մեծահասակների առաջնությանը կմասնակցեն
Հայաստանի 8 մարզիկներ
02-04-2010 18:18:00 | Բելոռուս | Սպորտ
ՄԻՆՍԿ, 2 ԱՊՐԻԼԻ, ՆՈՅՅԱՆ ՏԱՊԱՆ: Բելառուսում կայանալիք
ծանրամարտի Եվրոպայի տղամարդկանց 89-րդ եւ կանանց 23-րդ
առաջնություններին կմասնակցեն 30 երկրների 350 մարզիկներ:
Հայաստանից տղամարդկանց առաջնությունում հանդես կգան 6, իսկ կանանց
առաջնությունում` 2 ծանրամարտիկներ: Հայաստանյան պատվիրակությունը
ղեկավարում է ՀՀ Ծանրամարտի ֆեդերացիայի նախագահ Սամվել
Խաչատրյանը:
Մրցումները կմեկնարկեն ապրիլի 5-ին: Մինչ այդ` ապրիլի 2-4-ին,
Մինսկում կկայանա Ծանրամարտի Եվրոպայի ֆեդերացիայի կոնգրեսը:
Հայաստանի տղամարդկանց հավաքականից 56 կգ քաշային կարգում
Սմբատ Մարգարյանը մրցահարթակ կելնի ապրիլի 5-ին, 77 կգ քաշային
կարգում Տիգրան Գ. Մարտիրոսյանը` ապրիլի 8-ին, 85 կգ քաշային
կարգում Գեւորիկ Պողոսյանը եւ Արա Խաչատրյանը` ապրիլի 9-ին, 105 կգ
քաշային կարգում Արթուր Բաբայանը եւ գերծանր քաշային կարգում
Ռուբեն Ալեքսանյանը` ապրիլի 11-ին:
Կանանց հավաքականից 69 կգ քաշային կարգում Մելինե Դալուզյանը
մրցահարթակ կելնի ապրիլի 7-ին, 75 կգ քաշային կարգում Հռիփսիմե
Խուրշուդյանը` ապրիլի 10-ին: