6,2 մագնիտուդ հզորությամբ երկրաշարժ է տեղի ունեցել Իտալիայի կենտրոնական հատվածում, Պերուջա քաղաքից հարավ-արևելք: korrespondent.net-ի փոխանցմամբ` առնվազն զոհվել է վեց մարդ: Ստորգետնյա ցնցումները զգացվել են նաև Հռոմում:
Աղբյուրի տեղեկացմամբ` երկրաշարժն Իտալիայում տեղի է ունեցել տեղական ժամանակով 3:36-ին: Ամատրիչե քաղաքի քաղաքապետը տեղական ռադիոկայանին հաղորդել է, որ քաղաքի կենտրոնում ավերվել են որոշ շինություններ, որոնց փլատակների տակ մարդիկ են մնացել: Նա նաև ասել է, որ երկրաշարժի արդյունքում քաղաքը հոսանքազրկվել է:
Սերջիո Պերոցիի խոսքերով` քաղաքի կեսը վերացել է, քաղաք տանող ճանապարհները փակ են, իսկ մարդիկ գտնվում են փլատակների տակ:
La Repubblica պարբերականը հաղորդել է, որ Հռոմում 20 վայրկյան շարունակ շենքերը ցնցվել են:
Չորս անդամներից բաղկացած ընտանիքը հայտնվել է փլատակների տակ Ակումոլի քաղաքում: Ոստիկանությունը հաղորդել է, որ հարևան Պեսկարա դել Տրոնտո գյուղում երկու մարդ է զոհվել:
Երկրաշարժի մասին առաջին հաղորդագրություններում հաղորդվել է 6,4 մագնիտուդ հզորության մասին, իսկ հետո ցնցումները կրկնվել են:
«Ցնցումն այնքան ուժեղ էր, որ թվում էր թե մահճակալը մեզ հետ քայլում է սենյակում»,- ասել է Ռեյտեր Լինա Մերկանտին:
Իտալիայի քաղաքային պաշտպանության գործակալությունը երկրաշարժն անվանել է ավերիչ:
ՀԱՅԵՐԵՆ
Русский
English
Դաս. հայերեն
French
