Տասնյակ մարդիկ են զոհվել Սիրիայում Թուրքիայի գործողությունների արդյունքում
29-08-2016 12:36:14 | Սիրիա | Միջազգային
Սիրիայի հյուսիսում թուրքական ռազմաօդային ուժերի գրոհների արդյունքում մի քանի տասնյակ մարդիկ են զոհվել: korrespondent.net-ի փոխանցմամբ` այդ մասին հայտնում է մարդու իրավունքների սիրիական դիտորդական խորհուրդը, որի տվյալներով` կիրակի երկու հրթիռակոծությունների զոհ է դարձել առնվազն 35 խաղաղ բնակիչ, ևս 75-ը` ստացել են մարմնական վնասվածքներ:
Միաժամանակ թուրքական բանակի տվյալներով` սիրիական սահմանակից Ջերաբլուս քաղաքում ավիահարվածների արդյունքում զոհվել է քրդական ազգային ինքնապաշտպանության ստորաբաժանման 25 անդամ:
Ինչպես նշում է թուրքական Anadolu պետական գործակալությունը, զինվորականները ձեռք են առել բոլոր անհրաժեշտ միջոցները, որպեսզի խուսափեն խաղաղ բնակչությանը զոհ տալուց:
Իսկ Թուրքիայի նախագահ Ռեջեփ Թաիբ Էրդողանը, ելույթ ունենալով Գազիանթեպում կայացած իշխանամետ ցույցի ընթացքում, հայտարարել է, որ ռազմական գործողություններն ահաբեկչական խմբավորումների դեմ շարունակվելու են մինչև վերջ: