Առանց պետական աջակցության` արևային տեխնոլոգիաների ոլորտը Հայաստանում էական առաջընթաց չի ունենա. ամերիկահայ գիտնական (տեսանյութ)
27-09-2016 12:37:23 | Հայաստան | Գիտություն եւ տեխնոլոգիաներ
Եթե պետական աջակցություն չլինի, ապա արևային տեխնոլոգիաների ոլորտը Հայաստանում էական առաջընթաց չի ունենա: Նման կարծիք «Նոյյան Տապան»-ի թղթակցի հետ զրույցում նշեց Ամերիկայում «Հայ ինժեներների և գիտնականների միության» նախկին նախագահ Էդիկ Աթոյանը:
Ըստ նրա` Հայաստանի համար արևային տեխնոլոգիաների կիրառությունը շատ կարևոր նշանակություն ունի, հատկապես այն առումով, որ այդ դեպքում անհրաժեշտություն չի առաջանա խոշոր գումարներ ծախսել էլեկտրականություն, նավթ ու գազ գնելու համար:
Ամերիկահայ գիտնականի կարծիքով` էլեկտրականության, նավթի ու գազի գնման համար ծախսվող պետական գումարները կարելի է խնայել` դրանց հաշվին միաժամանակ աջակցելով բնակչությանն արևային տեխնոլոգիաներ գնելու և օգտագործելու հարցում:
Վերջինս հույս ունի, որ նոր վարչապետն իր ծրագրում ուշադրություն կդարձնի արևային տեխնոլոգիաների մասայականացման խնդրին, ինչը հնարավորություն կտա մեծ թափով զարգացնել տնտեսության տարբեր ճյուղերը և հատկապես գյուղատնտեսությունը: