Հայ-ադրբեջանական շփման գծում արձանագրվել են սահմանը խախտելու
դեպքեր
11-01-2010 15:40:00 | Հայաստան | Քաղաքական
Ուշադրություն, ուղարկվում է լուրի լրացված տարբերակը
ԵՐԵՎԱՆ, 11 ՀՈՒՆՎԱՐԻ, ՆՈՅՅԱՆ ՏԱՊԱՆ: 2009թ.-ի դեկտեմբերի 28-ի
ժամը 9-ի սահմաններում ՀՀ Տավուշի մարզում սահմանը խախտելու փորձ
կատարելիս ձերբակալվել է Ադրբեջանի Հանրապետության Թովուզի շրջանի
Ալիբեյլի գյուղի բնակիչ, 1963թ.-ին ծնված Էլդար Հեյդար օղլի
Թաղիեւը:
Ըստ ՀՀ Պաշտպանության նախարարության Տեղեկատվության եւ
հասարակայնության հետ կապերի վարչության հաղորդագրության, հունվարի
10-ի ժամը 19-ի սահմաններում գրանցվել է հայ-ադրբեջանական սահմանի
Երասխ-Նախիջեւան հատվածի խախտման միջադեպ: ՀՀ քաղաքացի Եղիշե
Պետրոսի Գեւորգյանը (ծնվ. 1958թ.), կնոջ եւ երեք անչափահաս
երեխաների հետ (7, 6 եւ 3 տարեկան) «Երազ» մակնիշի ավտոմեքենայով,
չենթարկվելով հայ սահմանապահների նախազգուշական հրահանգներին,
ճեղքել է հայ-ադրբեջանական սահմանին տեղակայված արգելափակոցները եւ
հատելով սահմանը, ադրբեջանական կողմից ավտոմեքենայի ուղղությամբ
արձակված կրակահերթի ներքո` անցել է Նախիջեւանի տարածք: Հայ
սահմանապահների կողմից ոչնչացման կրակ չի բացվել` ելնելով
ավտոմեքենայում երեք անչափահաս երեխաների գտնվելու հանգամանքից:
Ե.Գեւորգյանը նախկինում 8 անգամ դատապարտվել է կողոպուտի,
ավտոմեքենաների գողության եւ այլ հանցանքների համար: Դեպքի մասին
տեղեկացվել են միջազգային համապատասխան հումանիտար
կազմակերպությունները:
Նշված դեպքերի մասին տեղեկացվել է միջազգային
կազմակերպություններին: Հարուցվել են քրեական գործեր, դեպքերի
մանրամասները ճշտվում են: