Հայաստանը և Վրաստանը քննարկում են դեպի երրորդ երկրներ ընդհանուր արտահանման հնարավորությունները.Սուրեն Կարայան


Հայաստանը և Վրաստանը քննարկում են դեպի երրորդ երկրներ ընդհանուր արտահանման հնարավորությունները.Սուրեն Կարայան

  • 29-06-2017 14:26:21   | Հայաստան  |  Տնտեսություն

ՀՀ տնտեսական զարգացման և ներդրումների նախարար Սուրեն Կարայանն այսօր ընդունել  է  Վրաստանի Էկոնոմիկայի և կայուն զարգացման նախարար Գեորգի Գախարիայի գլխավորորած պատվիրակությանը։
Սուրեն Կարայանը ողջունել է գործընկերոջը և շնորհակալություն հայտնել այցի համար: Կարայանի խոսքով՝ թեև Հայաստանի և Վրաստանի միջև առևտրաշրջանառությունը աճում է, սակայն  տեմպերը գոհացուցիչ չեն, և կա դեռ չիրացված լուրջ ներուժ: Նախարարն առաջարկել է քննարկել այս և երկկողմ հետաքրքրություն ներկայացնող այլ հարցեր:  Սուրեն Կարայանն առաջարկել է քննարկել  և մշակել դեպի երրորդ երկրներ համատեղ արտահանմանն ուղղված ծրագրեր՝ հաշվի առնելով Հայաստանի և Վրաստանի համար առկա արտոնյալ շուկաները: Նախարարները հաստատել են, որ երկրներից յուրաքանչյուրն ունի իրեն բնորոշ ուժեղ կողմեր և մրցակցային առավելություններ, որոնց գրագետ համադրմամբ կարող են արդյունավետ համատեղ ծրագրեր իրականացվել: 
 
Վրաստանի Էկոնոմիկայի և կայուն զարգացման նախարար Գեորգի Գախարիան շնորհակալություն է հայտնել ջերմ ընդունելության համար և ընդգծել, որ քաղաքական որևէ տարաձայնության բացակայությամբ պայմանավորված՝ անհրաժեշտ է բոլոր ջանքերն ուղղել առևտրատնտեսական կապերի ամրապնդմանը: 
Հանդիպման ընթացքում պայմանավորվածություն է ձեռք բերվել ձևավորել աշխատանքային խումբ, որը կզբաղվի երկու երկրներում գործունեություն ծավալող հայ և վրացի  գործարարների խնդիրներով՝ դրանց օպերատիվ լուծումներ տալու նպատակով: 
Նախարարներ Կարայանը և Գախարիան քննարկել են ազատ տնտեսական գոտիների գործունեությունը Հայաստանում և Վրաստանում: Սուրեն Կարայանը գործընկերոջը տեղեկացրել է, որ Սյունիքի ազատ տնտեսական գոտում սկսվել են շինարարական աշխատաքները և հրավիրել է վրացական բիզնեսին գործունեություն ծավալելու Իրանին սահմանակից ԱՏԳ-ում: Գ. Գախարիան նշել է, որ այս ուղերձը կհասցնեն վրացի գործարարներին: 
Վրաստանի Էկոնոմիկայի և կայուն զարգացման նախարարը և ՀՀ տնտեսական զարգացման և ներդրումների նախարարն անդրադարձել են նաև զբոսաշրջության ոլորտին։ Քննարկվել են երկկողմ զբոսաշրջության զարգացման հնարավորությունները և միասնական տարածաշրջանային զբոսաշրջային ծրագրերի իրականացումը, որը կմշակվի ՏԶՆՆ զբոսաշրջության պետական կոմիտեի և Վրաստանի համապատասխան գերատեսչությունների կողմից։
 
Նոյյան տապան  -   Տնտեսություն

https://s1.merlive.am/Noian_Tapan/embed.html?autoplay=false&play