Երևանում մեկնարկեց Հայաստան-Իրան բիզնես ֆորումը՝ նվիրված երկու երկրների միջև դիվանագիտական հարաբերությունների 25-ամյակին
28-11-2017 12:27:20 | Հայաստան | Տնտեսություն
Իրանի Իսլամական հանրապետության (ԻԻՀ) արտգործնախարարի՝ Հայաստան կատարած այցի շրջանակներում Երևանում մեկնարկեց Հայաստան-Իրան բիզնես ֆորումը՝ նվիրված երկու երկրների միջև դիվանագիտական հարաբերությունների 25-ամյակին։
Համաժողովին մասնակցում են շուրջ 150 գործարարներ, որոնցից 20-ը Հայաստանում գործունեություն ծավալող իրանցի գործարարներ են, մոտ 80-ը՝ հայ, իսկ 50-ը՝ իրանցի տնտեսվարողներ։
Երկու երկրների գործարարները զբաղվում են սննդամթերքի վերամշակմամբ, տեխնոլոգիաների արտադրությամբ և առևտրով։
ՀՀ տնտեսական զարգացման և ներդրումների փոխնախարար Էմիլ Տարասյանի խոսքերով՝ հայ-իրանական առևտրատնտեսական հարաբերությունները գտնվում են շատ բարձր մակարդակի վրա և կառավարության ուշադրության ներքո։
«Կարծում եմ այս համաժողովը նույնպես միտված է երկու երկրների գործարարների և մասնավոր հատվածի միջև նոր կապերի հաստատմանը, եղած կապերի զարգացմանը»,- նշեց նա՝ ընդգծելով, որ Հայաստանն օտարերկրյա ներդրումները խթանելու համար իրականացնում է բաց դռների քաղաքականություն։
Է․ Տարասյանը փաստեց, որ իրանցի գործարարները գործունեություն ծավալելով Հայաստանում, կարող են օգտվել մի շարք այլ երկրների՝ ԱՄՆ-ի, Կանադայի, Ճապոնիայի, Շվեյցարիայի, Նորվեգիայի և Եվրամիության հետ Հայաստանի ունեցած արտոնյալ առևտրային ռեժիմներից։
Փոխնախարարի խոսքերով՝ իրանցի գործարարների համար լրացուցիչ հնարավորություններ է ստեղծում նաև օրերս Հայաստան-ԵՄ համապարփակ և ընդլայնված համաձայնագրի ստորագրումը։
«Ավարտական փուլում են գտնվում ԵԱՏՄ-ի և ԻԻՀ-ի միջև բանակցությունները, ինչպես նաև Սյունիքի մարզում ազատ տնտեսական գոտու ստեղծման աշխատանքները, որոնք նույնպես լրացուցիչ երկուստեք փոխշահավետ, նոր որակի համագործակցություն սկսելու հնարավորություններ են բացում»,- նշեց Է․ Տարասյանը՝ նկատելով, որ Հայաստանի և ԻԻՀ-ի միջև սերտ հարաբերություններ պետք է լինեն ոչ միայն առևտրատնտեսական, այլև տեխնոլոգիաների զարգացման ոլորտում։
Նա հիշեցրեց, որ ՀՀ վարչապետի Իրան կատարած այցի շրջանակներում նանոտեխնոլոգիաների ոլորտում երկու երկրների միջև ստորագրվել է համագործակցության հուշագիր։
ՀԱՅԵՐԵՆ
Русский
English
Դաս. հայերեն
French
