Կիոկուշին կարատեի Երևանի գավաթի առաջնության հաղթողները մասնակցելու են 2018 թվականին կայանալիք Հայաստանի գավաթի առաջնությանը (տեսանյութ)
25-12-2017 20:51:01 | Հայաստան | Սպորտ
Հայաստանի Կիոկուշին կարատեի ֆեդերացիան անցկացրել է հերթական մրցաշարը՝ Երևանի գավաթի առաջնությունը, որի հաղթողները մասնակցելու են հաջորդ տարի կայանալիք Հայաստանի գավաթի առաջնությանը: Իսկ Հայաստանի գավաթի առաջնության հաղթողներն իրենց հերթին կմասնակցեն Եվրոպայի առաջնությանը:
Մինչև կեսգիշեր տևած մրցումներին մասնակցել է 6-18 տարեկան 569 մարզիկ Հայաստանի բոլոր մարզերից և Երևանից:
Ինչպես «Նոյյան Տապան»-ի թղթակցի հետ զրույցում տեղեկացրեց Հայաստանի Կիոկուշին կարատեի ֆեդերացիայի նախագահ Անդրանիկ Հակոբյանը, Կիոկուշին կարատեի Եվրոպայի առաջնությունը Երևանում անցկացվելու է 2018 թվականի ապրիլի 7-ին և 8-ին:
Նրա փոխանցմամբ՝ Կիոկուշին կարատեի Եվրոպայի առաջնությանը մասնակցելու է 700 մարզիկ աշխարհի 25 երկրներից:
«Սա 2017 թվականի վերջին մրցաշարն էր: Այս տարվա ընթացքում մենք անցկացրել ենք բազմաթիվ առաջնություններ, որոնց ընթացքում մեր սաներն իրեն շատ լավ է դրսևորել»,- նշել է Ա. Հակոբյանը՝ հավելելով, որ Երևանի գավաթի առաջնության հաղթողները նաև պարգևատրվել են դիպլոմներով, մեդալներով և հատուկ նվերներով:
Հայաստանի Կիոկուշին կարատեի ֆեդերացիայի նախագահի խոսքերով՝ 2018 թվականը ևս մրցաշարերով հագեցած տարի է լինելու և ակնկալվում է կիոկուշին կարատեով զբաղվող երեխաների թվի ավելացում: