ՏՏ ոլորտը մի գործիք է, որն ընդլայնում է հնարավորինի և ավելի նեղացնում անհնարինի սահմանը. Նիկոլ Փաշինյան
23-05-2018 17:20:56 | Հայաստան | Գիտություն եւ տեխնոլոգիաներ
ՏՏ ոլորտը մի գործիք է, որն ընդլայնում է հնարավորինի և ավելի նեղացնում անհնարինի սահմանը:
Այս մասին մայիսի 23-ին կայացած Ինֆորմացիոն տեխնոլոգիաների ձեռնարկությունների միության (ԻՏՁՄ) տարեկան 18-րդ համաժողովի ընթացքում նշեց վարչապետ Նիկոլ Փաշինյանը:
Ըստ նրա՝ տեղեկատվական տեխնոլոգիաների ոլորտի զարգացումը կառավարության համար շարունակում է առաջնահերթություն է դիտվել, ուստի ոլորտին կցուցաբերվի լիակատար աջակցություն:
«Կա մի կարևոր նրբություն,թե ինչու ենք կարևորում տեղեկատվական տեխնոլոգիաների զարգացումը. դա ոչ միայն պրակտիկ խնդիր է, մեր կարծիքով, այլ նաև՝ գաղափարական: Մեր ընկալմամբ՝ ՏՏ ոլորտը մի գործիք է, որն ընդլայնում է հնարավորինի և ավելի նեղացնում անհնարինի սահմանը:
Կարծում եմ, որ Հայաստանում այս ժամանակաշրջանի ամենակարևոր առանձնահատկությունը հենց դա է՝ անհնարը մեզ համար գնալով ավելի ու ավելի հնարավոր է դառնում, և հնարավորի սահմաններն ավելի ու ավելի են ընդլայնվում»,- ընդգծեց Ն. Փաշինյանը՝ հավելելով, որ դա վերաբերում է բոլոր ոլորտներին:
Կառավարության ղեկավարի խոսքով՝ սա ընթացիկ շրջանի ամենակարևոր գաղափարական խնդիրն է, որովհետև Հայաստանի Հանրապետությունը և ժողովուրդը երկար տարիներ արգելակվել է «անհնարինություն» վերնագրված պատնեշների առաջ:
Նրա կարծիքով՝ այսօր աշխարհը հայ ժողովրդին նայում է որպես առաջամարտիկի, ուստի վերջիններս նոր նվաճումներով պետք է հաճելի անակնկալներ մատուցեն աշխարհին, Հայաստանի Հանրապետությանը և Արցախին: