Ազատագրուած տարածքները պիտի ծաղկին ու զարգանան. Րաֆֆի Դուդլակեան

11-06-2018 21:31:58 | Հայաստան | Մեկնաբանություն

Հրապարակախոս եւ հասարակական գործիչ, Թուֆէնքեան հիմնադրամի տնօրեն Րաֆֆի Դուդլակեանը իր ֆեյսբուկյան էջում գրում է․

Սա ազատագրուած Քաշաթաղի հարաւը գտնուող, Երիցվանք գիւղի մօտակայ արտերուն մէջ՝ Թուֆէնքեան հիմնադրամի հիմնած նուռի այգին է։ Երիցվանքն ու իր կազմին մէջ գտնուող շրջակայ գիւղակները ունին աւելի քան 300 հայ բնակիչ։ Այս հայորդիներուն մէկ մասը եկած է Հայաստանի տարբեր շրջաններէն, իսկ ոմանք նախկին Սովետական Ադրբեջանէն եկած գաղթականներ են։ Երիցվանքի հողերը բերրի են, իսկ Հակարի գետի առկայութիւնը մրգատու ծառերուն ու բանջարեղէնի համար ջուր կը հայթայթէ տարուան ամբողջ տևողութեան։

Թուֆէնքեան հիմնադրամի նուռի այգին աշխատանք կը հայթայթէ շրջանի բնակիչներուն, որոնք ապագային նաև պիտի օգտուին բերքի վաճառքէն ու այլ մրգատու ծառերէն։

Վարդանը այգին խնամող հոգատար պարտիզպանն է։ Ան ամէն օր առտու կանուխէն իր քրտինքը կը խառնէ նահատակներու արիւնով ազատագրուած այս հողին, որպէսզի մեր դաշտերը կանաչ ու պարարտ դառնան։ Վարդանի քրտինքով՝ ազատագրուած տարածքներուն վրայ կեանքը կը ծաղկի, հողը կ'օրհնուի, իմաստ կը ստանայ։

Ազատագրուած տարածքները կը պահեն ոչ թէ խօսքով, այլ՝ քրտինքով և աշխատանքով։

Մենք կը հաւատանք այս երկրին, այս տարածքներու ապագային, այս ժողովուրդին։

Կը հաւատանք ու կ'աշխատինք միասին՝ մեր հողերու զարգացման յոյսով...

Նոյյան տապան - Մեկնաբանություն