Միացեալ Նահանգներու մայրաքաղաք Ուաշինկթընի մէջ 27 յունիսին պիտի սկսի «Ֆոլքլայֆ» փառատօնը, որուն առաջին անգամն ըլլալով պիտի մասնակցի Հայաստանը, իսկ բացման հանդիսաւոր արարողութեան ներկայ պիտի ըլլայ նաեւ Հայաստանի նախագահ Արմէն Սարգսեան:

 

Այս փառատօնին մասին յաւելեալ տեղեկութիւններ ունենալու համար «Ազդակ» զրոյց մը ունեցաւ կազմակերպիչ «Սմիթսոնեան հիմնարկ»-ին մէջ աշխատողներէն Ալիք Գանտահարեանին հետ, որ դիտել տուաւ, թէ այս  հռչակաւոր հիմնարկը 50 տարիէ ի վեր կը կազմակերպէ այս փառատօնը, իւրաքանչիւր տարի կ՛ընտրուի երկիր մը, եւ կը ներկայացուին այդ երկրին մշակոյթը, աւանդութիւնները, կերակրատեսակները, արուեստի գործերը, ձեռագործները` կենդանի կերպով:

 

«Այս առիթով հիմնարկը տուեալ երկրէն կը հրաւիրէ նաեւ մասնակիցներ, այս պարագային` թոնիրի լաւաշ թխողներ, արուեստագէտներ, ձեռային աշխատանքի մասնագէտներ եւ այլն: Ուրեմն Հայաստանէն այս առիթով հրաւիրուած է 90 մասնակից: Նպատակը մշակոյթի եւ ազգագրական յատկութիւններու ներկայացման ճամբով երկիրն ու ժողովուրդը ծանօթացնելն է», դիտել տուաւ Ա. Գանտահարեան: Այս տարի փառատօնին հիմնական հերոսը վարպետն է, որուն ընդմէջէն ցոյց պիտի տրուին տարբեր արհեստներ, ներկայի ու անցեալի կապը` լուսարձակի տակ առնելով այն, որ պէտք է պահպանել աւանդութիւնները եւ փոխանցել յառաջիկայ սերունդներուն: Փառատօնի ծիրին մէջ պիտի ներկայացուի խաչքարագործութիւնը, կաւագործութիւնը, փայտագործութիւնը, գորգագործութիւնը, այդ ալ կենդանի կերպով, այսինքն` խաչքարը հոն պիտի սկսի փորագրուիլ եւ հոն ալ պիտի աւարտի, նոյնը` միւս արհեստներու պարագային: Ասեղնագործութիւնը պիտի ներկայացուի սուրիահայերուն կողմէ, կարեւոր տեղ պիտի գրաւէ նաեւ հայկական խոհանոցը` իր լաւաշով, չոր միրգերով, գինիով, պաստեղով, տոլմայով, պանիրով եւ այլն:

 

Ան յատկանշական նկատեց այն, որ աշխարհի կարեւորագոյն կեդրոններէն մէկուն մէջ Հայաստանի ազգագրական կեանքի, մշակութային իւրայատկութիւններու ծանօթացում պիտի ըլլայ, իսկ նկատի ունենալով այն իրողութիւնը, որ յուլիս 4-ը անկախութեան օրն է, տարբեր ազգութիւններէ մեծաթիւ անձեր Ուաշինկթըն կը գտնուին այդ օրերուն: «Համաշխարհային մակարդակի վրայ մեր մշակոյթով մենք մրցունակ ենք. այդ բարձր որակը, համամարդկային արժէքները մեծապէս կը հետաքրքրեն միջազգային հանրութիւնը, ուստի շատ կարեւոր է եւ լաւ առիթ է, որ նման ծրագիրներով բոլորին ուշադրութեան առարկան դարձնենք Հայաստանը», դիտել տուաւ Ա. Գանտահարեան` աւելցնելով, որ հայկական մշակոյթն ալ տիրական ներկայութիւն պիտի ըլլայ:

 

Եզրափակելով` Ալիք Գանտահարեան ըսաւ. «Հայաստանի մէջ տեղի ունեցած վերջին իրադարձութիւնները, թաւշեայ յեղափոխութիւնը մեր պետութիւնն ու երկիրը վերածեցին մոտել պետութեան եւ հասարակութեան, որովհետեւ ամբողջ համակարգ մը փոխուեցաւ առանց միջադէպերու, առանց բախումներու, քաղաքակիրթ ձեւով: Աշխարհին ուշադրութիւնը կեդրոնացաւ մեր երկրին վրայ. այս փառատօնին ճամբով նաեւ մեր մշակոյթով, ազգագրութեամբ պէտք է փաստենք, որ մեր երկիրը իւրայատուկ է, աշխարհի քաղաքակրթութեան զարգացման մեծ նպաստ բերած է եւ կը շարունակէ բերել»:

 

 

Նոյյան տապան  -   Հասարակություն