Եթե «Made in Italy» բրենդն աշխարհում լավն է, ապա «Made in Armenia»-ն՝ կարող է շատ հետաքրքիր լինել. ԵՄ-ում ՄԱԱԶԿ-ի ներկայացուցիչ
15-10-2018 19:23:36 | Հայաստան | Հասարակություն
Եթե «Made in Italy» բրենդն աշխարհում լավն է, ապա «Made in Armenia»-ն՝ կարող է շատ հետաքրքիր լինել:
Նման կարծիք «Նոյյան Տապան»-ի թղթակցի հետ զրույցում հայտնեց Ֆրանկոֆոնիայի 17-րդ գագաթնաժողովի շրջանակներում Հայաստան այցելած ՄԱԿ-ի արդյունաբերական զարգացման կազմակերպության (ՄԱԱԶԿ) Բրյուսելի գրասենյակի ղեկավար, ԵՄ-ում ՄԱԱԶԿ-ի (UNIDO) ներկայացուցիչ Պատրիկ Ջիլաբերը:
Նրա խոսքերով՝ ինքը լիովին համաձայն է Հայաստանի նախագահ Արմեն Սարգսյանի այն դիտարկման հետ, որ Հայաստանը արևելքն արևմուտքին, հյուսիսն հարավին կապող խաչմերուկ է, որը պետք է կարողանա լավագույնս օգտագործել ոչ միայն այդ դերակատարումը, այլև Սփյուռքի տնտեսական ներուժը:
Ըստ Պ. Ջիլաբերի՝ ՄԱԱԶԿ-ի գործունեության ավելի քան 60 տոկոսն ուղղված է աջակցելու զարգացող երկրներին և իրենց ձեռնարկություններին՝ անցում կատարելու շրջանաձև տնտեսությունների, բնական ռեսուրսների ավելի արդյունավետ կառավարմանը՝ հնարավորինս խուսափելով թափոնների առաջացումից, պահպանելով միջազգային համաձայնագրերի հանդեպ պարտավորությունները:
«ՄԱԿ -ի համակարգում ՄԱԱԶԿ-ն ունիկալ է այն առումով, որ աշխատում է կոնկրետ փոքր և միջին ձեռնարկությունների (ՓՄՁ) և արտադրությունների հետ: Ինչպես մեր տեքստիլի ծրագրի կամ հնդկաձավարի արտադրության դեպքում, միջազգային փորձագետները գալիս են Հայաստան և անմիջապես արտադրամասում տեղացի բանվորներին փոխանցում իրենց փորձը, նաև օգնում խորհուրդներով»,- նշեց Պ. Ջիլաբերը՝ հավելելով, որ ՓՄՁ-ներին ցուցաբերվող աջակցության մեջ է մտնում նաև տարածաշրջանային և գլոբալ շուկաների հետ կապերի հաստատումը:
Անդրադառնալով Ֆրանկոֆոնիայի գագաթնաժողովին՝ ԵՄ-ում ՄԱԱԶԿ-ի ներկայացուցիչը կարևորեց այն՝ նշելով, որ ՄԱԿ-ից հետո Ֆրանկոֆոնիայի միջազգային կազմակերպությունը (ՖՄԿ) երկրորդ խոշոր կազմակերպությունն է, որի հետ պետք է սերտորեն համագործակցել հատկապես տնտեսական զարգացման համաժողովներին ներգրավվելու առումով:
Նրա փոխանցմամբ՝ ՄԱԱԶԿ-ն առաջին անգամն է մասնակցում Ֆրանկոֆոնիայի գագաթնաժողովին և ինքը՝ որպես այդ կազմակերպության ներկայացուցիչ, նույնպես առաջին անգամ այցելել է Հայաստան:
«Այսօր Հայաստանում հավաքվել է Ֆրանկոֆոնիայի գունեղ ընտանիքը, որին միավորում է մի լեզու, որով խոսում է 5 մայրցամաքների ավելի քան 300 միլիոն բնակչություն: ՄԱԱԶԿ-ն հպարտ է մասնակցելու Ֆրանկոֆոնիայի գագաթնաժողովի շրջանակներում Երևանում կազմակերպված տնտեսական համաժողովին»,- նկատեց Պ. Ջիլաբերը:
Վերջինս կիսվելով գագաթնաժողովից ստացած տպավորություններով, առաջին հերթին կարևորեց հայ բարձրաստիճան պաշտոնյաների՝ սովորականից բաց և հասանելի լինելու հանգամանքը, և երկրի անվտանգ ու ապահով վիճակը:
«Ես տեսա, որ երկիրն ունակ է հյուրընկալել այդքան այլ երկրների նախագահների, կազմակերպել նրանց այցը բացօթյա միջոցառումներին, երբ ժողովուրդը նույն հրապարակում է, իսկ մեկ քայլ այն կողմ նստած են նախագահները, այսինքն՝ սա խոսում է այն մասին, թե որքան ապահով է երկիրը, որքան հանգիստ է ժողովուրդը, որ կարող ես հանգիստ մոտենալ և հետաքրքրող հարցերը քննարկել ղեկավար անձանց հետ»,- ընդգծեց ՄԱԱԶԿ Բրյուսելի գրասենյակի ղեկավարը:
ՀԱՅԵՐԵՆ
Русский
English
Դաս. հայերեն
French
