Մենք գալիս ենք պատասխանատվության ենթարկելու ժողովրդի նկատմամբ կատարված հանցագործությունների պարագլուխներին. Ժիրայր Սէֆիլյան (ՏԵՍԱՆՅՈՒԹ)
13-11-2018 20:17:16 | Հայաստան | Հասարակություն
«Սասնա ծռեր» կուսակցության նախընտրական ցուցակը կգլխավորի Վարուժան Ավետիսյանը, իսկ երկրորդ համարը կլինի քաղաքագետ Ստեփան Գրիգորյանը:
Այս մասին նոյեմբերի 14-ին լրագրողների հետ հանդիպման ժամանակ տեղեկացրեց «Սասնա ծռեր» կուսակցության պատվավոր ներկայացուցիչ Ժիրայր Սէֆիլյանը:
Ըստ նրա՝ «Սասնա ծռեր»-ը չի լինելու ընդդիմություն, այլ լինելու է հակակշիռ բևեռ:
Ժ. Սէֆիլյանի խոսքերով, եթե երկրում օր առաջ զսպող ուժ չձևավորվի, ապա իշխող ուժի սխալները կլինեն ավելի շատ:
«Մենք նաև գալիս ենք արմատական և համակարգային փոփոխություններ իրականացնելու, անշուշտ հանգրվանային ձևով է լինելու այդ ամենը, նաև մենք գալիս ենք պատասխանատվության ենթարկելու այս տարիների ընթացքում մեր ժողովրդի նկատմամբ կատարված հանցագործությունների պարագլուխներին: Այո՛, պետք է այդ մարդիկ օր առաջ մեկուսացվեն մեր հասարակությունից, խոսքը վերաբերում է և Ռոբերտ Քոչարյանին, և Սերժ Սարգսյանին, և նրանց ղեկավարած բանդաներին»,- ընդգծեց Ժ. Սէֆիլյանը:
Ս. Գրիգորյանի խոսքերով՝ «Սասնա ծռեր»-ին է միացել, որովհետև այս ուժին համարում է ազնիվ և հայրենասեր:
Նրա փոխանցմամբ՝ «Սասնա ծռեր»-ը միակ կուսակցությունն է, որն ունի լուրջ հայեցակարգ: