Բանակցող կողմը հակված է հասկանալու և ընդունելու, որ ծխելն արգելող օրենքում կան վերանայման ենթակա կետեր. Նարգիլեի բիզնեսով զբաղվողներ (ՏԵՍԱՆՅՈՒԹ)
12-02-2019 16:39:16 | Հայաստան | Հասարակություն
Բանակցող կողմը հակված է հասկանալու և ընդունելու, որ «Ծխախոտի օգտագործման և ծխախոտի ծխի ազդեցության հետևանքով առողջությանը հասցվող վնասի նվազեցման և կանխարգելման մասին» օրենքում կան վերանայման ենթակա կետեր:
Այս մասին փետրվարի 12-ին լրագրողների հետ հանդիպման ժամանակ հայտարարեցին Հայաստանում նարգիլեի բիզնեսով զբաղվողները, ովքեր ակտիվ բանակցությունների մեջ են գտնվում Առողջապահության ազգային ինստիտուտի և շահագրգիռ այլ հասարակական կազմակերպությունների ներկայացուցիչների հետ:
Ըստ Գոռ Գասպարյանի՝ առողջապահության նախարարությունում արդեն հասկացել են, որ իրենք որևէ առնչություն չունեն ծխախոտի արտադրության հետ, հետևաբար վերոնշյալ օրենքը չպետք է տարածվի իրենց վրա:
«Այն, որ մենք արդեն գտնվում ենք բանակցությունների սեղանի շուրջ, դրական տեղաշարժ է: Շարունակում ենք պնդել, որ պետք չէ նարգիլեն և ծխախոտը վերցնել մեկ կետի տակ, որովհետև կան ահավոր նուրբ հարցեր, որոնք ուղղակի անհնար կլինի օրենքով իրագործել, եթե չլինեն համապատասխան փոփոխություններ: Մենք հենց դրա շուրջ էլ այս պահին բանակցում ենք, որպեսզի նարգիլե սիրողների իրավունքները չոտնահարվեն»,- ընդգծեց Գ. Գասպարյանը;
Վերջինիս փոխանցմամբ՝ բանկցություններին մասնակցում են չորս հոգուց կազմված աշխատանքային խմբով և չորեքշաբթի պատրաստվում են իրենց բոլոր առաջարկությունները գրավոր տեսքով ներկայացնել Առողջապահության ազգային ինստիտուտ, որից հետո ուրբաթ օրը կրկին հանդիպելու են կոնկրետ քննարկման մասնակցելու նպատակով:
Ժորա Փանոսյանն իր հերթին նկատեց, որ իրենք կլինեն հասարակական սննդի մատուցման առաջին օբյեկտների ներկայացուցիչները, ովքեր սեղաններից կհավաքեն մոխրամանները և կստանձնեն պարտավորություն վերահսկել այդ նույն օբյեկտներում ծխախոտի արգելումը: