Նաիրա Զոհրաբյանը ստում է. Ես ոչ մեկի համար ոչ մի ելույթ չեմ դասավորել. Մարիա Կարապետյան (ՏԵՍԱՆՅՈՒԹ)
08-04-2019 12:54:51 | Հայաստան | Հասարակություն
Նաիրա Զոհրաբյանը ստում է. Ես ոչ մեկի համար ոչ մի ելույթ չեմ դասավորել:
Այս մասին ապրիլի 8-ին Ազգային Ժողովում արտահերթ խոհրդարանական նիստի ընթացքում իր ելույթում հայտարարեց «Իմ քայլը» խմբակցության պատգամավոր Մարիա Կարապետյանը:
Ըստ նրա՝ ապրիլի 5-ին Մարդու իրավունքներին նվիրված խորհրդարանական լսումների ժամանակ ԱԺ ԲՀԿ խմբակցության պատգամավոր Նաիրա Զոհրաբյանը միջանցքում նշել է, թե Մարիա Կարապետյանն է թաքուն ծրագրում ամբիոնից հնչող ելույթները:
«Անհերքելի է, որ խորհրդարանական լսումները բաց են եղել տիկին Զոհրաբյանի ղեկավարած հանձնաժողովի քարուղարության հեռախոսահամարով գրանցված բոլոր հասարակական կազմակերպությունների համար, և ես ոչ մի ելույթ չեմ դասավորել ոչ մեկի համար: Բայց սրանով տիկին Զոհրաբյանի տարածած ստերի շրջանակը չի սպառվել»,- ընդգծեց Մ. Կարաետյանը:
Վերջինիս պնդմամբ՝ Զոհրաբյանը ստում է, երբ նշում է, թե իրենց հանձնաժողովը (Մարդու իրավունքների պաշտպանության և հանրային հարցերի մշտական հանձնաժողով) հստակ թեմաներ է հաստատել լսումների օրակարգի համար:
Պատգամավորի խոսքերով՝ մարտի 11-ի հանձնաժողովի նիստին հաստատվել է մի օրակարգ, որտեղ թեմաներ չեն եղել:
Ի դեպ՝ քիչ առաջ Նաիրա Զոհրաբյանն իր ֆեյսբուքյան էջում պատասխանել է Մարիա Կարապետյանին՝ գրելով.
«Ստրասբուրգից հետևեցի «Իմ քայլը» դաշինքի պատգամավոր Մարիա Կարապետյանի բոցաշունչ ելույթին ԱԺ ամբիոնից: Ինչպես միշտ օրակարգից դուրս ելույթ ՝ իրեն հոգեհարազատ հասարակակական կազմակերպությունների շահը պաշտպանելու համար: Տիկին Կարապետյանի յուրաքանչյուր բառը սուտ է և ապատեղեկատվություն:
Երևի թե հեղափոխական նոր թրենդի մեջ է ստախոսությունը, մանիպուլյացիան, ապատեղեկատվությունը, բայց վստահեցնում եմ ձեզ ՝ իմ դեպքում դա ուղղակի չի անցնելու: Մնացածը, շատ ավելի հանգամանալից, Սրտասբուրգից վերադառնալուց հետո:
Տիկի՛ն Կարապետյան, հեղինակություն նման անազնիվ մեթոդներով չեն վաստակում, եթե անգամ ձեր այսօրինակ գործունեության համար Եվրոպական միությունը ձեր դոշին փակցնում է «Քաջ կին» մրցանակը: Մնացածն իմ ընկեր Գևորգ Պետրոսյանի խոսքում»: