Մեր պատվի խնդիրն է հուսախաբ չանել մեր համաքաղաքացիներին. Վալերի Օսիպյան (ՏԵՍԱՆՅՈՒԹ)
16-04-2019 15:01:38 | Հայաստան | Հասարակություն
Մեր ամենաթանկ գնահատականը հանրության հավատն ու վստահությունն է ոստիկանության հանդեպ:
Այս մասին ապրիլի 16-ին Ոստիկանության 101-ամյա տարեդարձին նվիրված միջոցառման ընթացքում հայտարարեց ՀՀ ոստիկանության պետ Վալերի Օսիպյանը:
Ըստ նրա՝ բոլոր ժամանակներում ոստիկանությունը պատասխանատու է երկրի ներքին անվտանգության և քաղաքացիների անդորրի համար:
«Ոստիկանությունն այնտեղ է, որտեղ երկիրն ու քաղաքացին ունեն իր կարիքը: Այսօր էլ ոստիկանության զորքերն ավագ սերնդի օրինակով և ավանդույթով հայրենի սահմանների պաշտպանությունը զուգորդում են հասարակական կարգի ապահովման գործառույթի հետ: Ոստիկանությունը որպես պետական հիմնասյուն՝ միշտ համաքայլ է ժամանակի պահանջին ու հանրային զարգացումներին, մշտական կատարելագործման ընթացքի մեջ և ապագային միտված, մշտապես արձագանքող արդիականացման հրամայականին և ամենակարևորը՝ ժողովրդի կողքին,- ընդգծեց Վ. Օսիպյանը:
Նրա համոզմամբ՝ ոստիկանության գերխնդիրը հասարակության անվտանգության ապահովումն է և մարդու իրավունքների պաշտպանությունը:
Օսիպյանի խոսքերով՝ ոստիկանությունը բազմիցս հայտնվել է բադրագույն իրավիճակներում, ունեցել ծանր կորուստներ, անդառնալի զոհեր, բայց անգամ նման իրավիճակներում միշտ եղել է ամուր, պրոֆեսիոնալ:
«Մեր մասնագիտական ու մարդկային խնդիրն է, ավելին՝ մեր պատվի խնդիրն է հուսախաբ չանել մեր համաքաղաքացիներին, ոչ մի քայլ չնահանջել գլխավոր մարտահրավերներից՝ կոռուպցիայի, կաշառակերության, այլ արատավոր երևույթների դեմ անզիջում պայքարից»,- շեշտեց ոստիկանապետը՝ միաժամանակ ընդունելով, որ իրենց աշխատանքում դեռևս թերացումներ կան: