ԱԺ այգին փակելը, ոստիկանության կողմից կիրառված ուժն ու գործողությունները նմանակում են նախկին իշխանությունների վարքագիծը, ինչն անընդունելի է. ԻՊԱՍ ՀԿ
20-08-2019 12:28:49 | Հայաստան | Հասարակություն
«Իրավունքների պաշտպանություն առանց սահմանների» հասարակական կազմակերպությունը իր մտահոգությունն է հայտնում Ամուլսարի հանքի շահագործման դեմ բողոքի ակցիայի ընթացքում ոստիկանության կողմից խաղաղ հավաքի մասնակիցների նկատմամբ դրսևորած անահամաչափ ուժի, բռնությունների, քաղաքացիների խաղաղ հավաքի իրավունքի ոչ իրավաչափ միջամտության և քաղաքացիներին անօրինական կարգով բերման ենթարկելու կապակցությամբ:
2019 թվականի օգոստոսի 19-ի առավոտյան ակտիվիստները բողոքի ակցիա են անցկացրել Բաղրամյան 26-ի դիմաց: Վերջիններս նախ փորձել են փակել Բաղրամյան պողոտան, սակայն ոստիկանությունը ուժի կիրառմամբ վերականգնել է երթևեկությունն ու հեռացրել մասնակիցներին:
Ակցիայի ընթացքում մասնակիցներից 6-ը բերման են ենթարկվել ոստիկանության Արաբկիրի բաժանմունք՝ ոստիկանի օրինական պահանջին չենթարկվելու համար: Քաշքշոցի ընթացքում կարմիր բերետավորների կողմից անհամաչափ ուժ է կիրառվել բնապահպանների և ցուցարարների նկատմամբ, բերման ենթարկվելու ընթացքում արձանագրվել են մասնակիցների իրավունքների կոպիտ խախտումներ:
Ոստիկանության և ակցիայի մասնակիցների բախման ընթացքում ոստիկանների կողմից գետնին է տապալվել իրավապաշտպան Զարուհի Հովհաննիսյանը, ում նկատմամբ նույնպես ոստիկանության գործողությունները եղել են անհամաչափ:
Կազմակերպությունը հիշեցնում է, որ յուրաքանչյուր ոք խաղաղ հավաքների իրավունք ունի, և այդ իրավունքի իրացումը երաշխավորված է նաև Հայաստանի Հանրապետության կողմից: Հավաքների ազատությունը համարվում է ժողովրդավարության հիմքերից մեկը. այն հանդիսացել է ՀՀ-ում 2018 թվականին տեղի ունեցած հեղափոխության հիմքը, խաղաղ հավաքների մասնակիցները ինչպես նախկինում, այնպես էլ այսօր հավաքների միջոցով պայքարում են անօրինականությունների դեմ:
Այս համատեքստում հավաքների ազատության դեմ գործադրվող ցանկացած սահմանափակում անմիջական և ուղիղ ոտնձգություն է հեղափոխության և դրանով ամրագրված՝ մարդու իրավունքների պաշտպանության կարևորագույն սկզբունքների դեմ։
2019 թվականի օգոստոսի 19-ին Ազգային ժողովի այգին փակելը, ոստիկանության կողմից կիրառված ուժն ու գործողությունները նմանակում են նախկին իշխանությունների վարքագիծը, ինչն անընդունելի է։
«Իրավունքների պաշտպանություն առանց սահմանների» հասարակական կազմակերպությունը հորդորում է ոստիկանությանը զերծ մնալ նման վարքագծի դրսևորումից և խուսափել անձանց իրավունքների հնարավոր հետագա խախտումներից:
Կազմակերպությունը հիշեցնում է, որ ոստիկանության կողմից դրսևորված վարքագիծն ավելի շատ բնութագրական է ոստիկանության` որպես ուժային կառույցի գործունեությանը և հակասում է ոստիկանության` քաղաքացիների իրավունքների և ազատությունների պաշտպանություն ապահովելու առաքելությանը:
ՀԱՅԵՐԵՆ
Русский
English
Դաս. հայերեն
French
