Ատոմ Ջանջուղազյանն ընդունել է Սինգապուրի Հանրապետության ավագ նախարարին

01-10-2019 17:12:39   | Հայաստան  |  Ֆինանսներ
 

Հոկտեմբերի 1-ին ՀՀ ֆինասների նախարար Ատոմ Ջանջուղազյանն ընդունել է Սինգապուրի Հանրապետության ավագ նախարար և սոցիալական քաղաքականության համակարգող նախարար Թարման Շանմուգարատնամի գլխավորած պատվիրակությանը:
 
Նախարար Ջանջուղազյանը ներկայացրել է ՀՀ մակրոտնտեսական կայունության ապահովմանն ու պարտքի արդյունավետ կառավարմանն ուղղված քայլերը, հարկաբյուջետային կանոնների կիրառման սկզբունքները և բարենպաստ գործարար միջավայրի ու ներդրումների ներգրավմանը նպաստող պայմանների ստեղծման ուղղությամբ տարվող աշխատանքները: Նախարարն անդրադարձել է նաև հարկային
ոլորտի բարեփոխումներին՝ նշելով, որ նպատակ է դրվել վերհանել ոլորտում առկա խնդիրները և առաջարկել համապարփակ լուծումներ:
Թարման Շանմուգարատնամն իր հերթին ներկայացրել է Սինգապուրի պրոգրեսիվ հարկաբյուջետային համակարգը, կրթության, առողջապահության և այլ ոլորտներում վարվող արդյունքահեն քաղաքականության սկզբունքները, ինչպես նաև պահպանողական մոտեցումների դերը պետական կառավարման համակարգում:
 
Հանդիպման ընթացքում կողմերը քննարկել են նաև կարողությունների զարգացմանը, երկրի վստահելիության տեսանկյունից միջազգային ֆինանսական կառույցների հետ համագործակցության առանձնահատկություններին և տնտեսական աճի խթանմանն ուղղված քայլերին առնչվող հարցեր:
 
Ս.թ. հուլիսի 8-ին ստորագրվել է «Հայաստանի Հանրապետության և Սինգապուրի Հանրապետության միջև եկամուտների կրկնակի հարկումը բացառելու մասին» համաձայնագիրը: Համաձայնագրի կիրառությունը երկու կողմի ներդրողների համար կձևավորի կանխատեսելի հարկային դաշտ, կխթանի երկու երկրների միջև փոխադարձ ներդրումային հոսքերը, ինչպես նաև կակտիվացնի առևտրատնտեսական կապերը: Այդ նպատակով ՀՀ ֆինանսների նախարարությունը սկսել է համաձայնագրի վավերացման համար ՀՀ օրենսդրությամբ նախատեսված ընթացակարգերը, որոնք ավարտելուց հետո համաձայնագիրը ներկայացվելու է ՀՀ Ազգային ժողով վավերացման համար:
 
Նոյյան տապան   -   Ֆինանսներ
Լուրեր Հայաստանից եւ Սփյուռքից

Կարդացել են 2668 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար