2019թ ՏՏ պետական մրցանակակիրը կիսվել է Հայաստանի մասին իր տպավորություններով
05-12-2019 18:52:30 | Հայաստան | Մամլո հաղորդագրություն
Տեղեկատվական տեխնոլոգիաների ոլորտում համաշխարհային ներդրման համար ՀՀ պետական մրցանակի 2019թ դափնեկիր ճապոնացի գիտնական, դոկտոր Տակեո Կանատեի մասնակցությամբ դեկտեմբերի 5-ին տեղի է ունեցել մամուլի ասուլիս, որին մասնակցել են ՀՀ բարձր տեխնոարդյունաբերության նախարարի տեղակալ Արմեն Աբրոյանը, Ճապոնիայում ՀՀ արտակարգ և լիազոր դեսպան Հրանտ Պողոսյանը, մրցանակաբաշխության կոմիտեի աշխատանքները համակարգող, «Սինոփսիս Արմենիա» ընկերության գործադիր տնօրեն Հովիկ Մուսայելյանը, մրցանակաբաշխության հովանավոր «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանը:
Նախարարի տեղակալ Արմեն Աբրոյանը ողջունել է ներկաներին, շնորհավորել Տակեո Կանատեին հոբելյանական 10-րդ մրցանակաբաշխության դափնեկիրը լինելու համար, ընդգծել է գիտնականի ունեցած մեծ ներդրումը համաշխարհային գիտության առաջընթացի գործում։
«Պարոն Կանատեն Կարնեգի-Մելոն համալսարանի դասախոս է, ով վիրտուալ իրականության հասկացության հայտնագործողն ու ներդնողն է: Նրա հայտնագործությունները մեծ նշանակություն են ունեցել և կարող են ունենալ ապագայում բժշկության, անվտանգության և ժամանցային ոլորտներում»,- ասել է նախարարի տեղակալը։
Արմեն Աբրոյանն ընդգծել մրցանակաբաշխության կարևորությունը, որը թույլ է տալիս, որպեսզի Հայաստանը հանդես գա որպես տարածաշրջանային կենտրոն։
«Մենք շատ ենք կարևորում մեր հայրենակիցների հաջողությունները և ներդրումը համաշխարհային ոլորտում, հիշում ենք նրանց անունները, բայց շատ կարևոր է նաև գնահատել համաշխարհային, այլ ազգի ներկայացուցչների ներդրումը տեխնոլոգիական ոլորտում, որը նաև թույլ է տալիս մեզ օգտվել այդ հայտնագործություններից»,- նշել է նա։
«Սինոփսիս Արմենիա» ընկերության գործադիր տնօրեն, Հովիկ Մուսայելյանն ընդգծել է, որ սա բացառիկ հնարավորություն է մեր երկրի ու ժողովրդի համար՝ ունենալ նման առաջնորդություն՝ ընդունելու, մեծարելու և վայելելու համաշխարհային նշանակության նման մեծությունների ներկայությունը Հայաստանում։ Նրա խոսքով՝այս միջոցառումն առավել ևս կարևոր է մեր երիտասարդության համար, նշել, որ այս շփումները լուրջ ներդրումներ են մեր երկրի ապագայի համար։
«ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանն էլ իր խոսքում նշել է, որ պատահական չէ, որ Հայաստանը պետական մրցանակ է շնորհում համաշխարհային ներդրումների համար, ներդրումներ, որոնք փոխել են մարդկության կյանքը։ Նրա խոսքով՝ մրցանակաբաշխության 10-ը տարիների ընթացքում Հայաստանը բավականին աշխատանք է կատարել դեպի զարգացած տեխնոլոգիական երկիր լինելու համար։
Ճապոնիայում ՀՀ արտակարգ և լիազոր դեսպան Հրանտ Պողոսյանը խոսել է այն, թե ինչո՞ւ է առաջարկել պարոն Կանատեի թեկնածությունը, պատմել է նրա հետ ծանոթության մասին:
«Նա ակադեմիական գիտնական է, արդեն 50 տարի է՝ աշխատում է այդ ոլորտում, որից մեկը այսօր բոլորիս համար դարձել է շատ հայտնի, որովհետև շատ հաճախ մենք լսում ենք, թե ապագան կապված է արհեստական բանականության հետ և Կանատե սենսեի հիմնական գործերը անմիջապես կապված են այդ ոլորտի հետ»,- ասել է Հրանտ Պողոսյանը։
Դոկտոր Տակեո Կանատեն շնորհակալություն է հայտնել նման մեծ պատվի արժանանալու և լինելու այն հայտնի 10 գիտնականների շարքում, որոնք արժանացել են այս մրցանակին։
«Ինձ համար մեծ պատիվ է դառնալ ՏՏ ոլորտում համաշխարհային ներդրման համար ՀՀ պետական մրցանակի 2019թ. դափնեկիր: Ես լսել եմ, որ Հայաստանում բարձր տեխնոլոգիաների ոլորտն ավելին է, քան պարզապես կարգախոս: Սա շատ ողջունելի է, և պատվաբեր է նման երկրի կողմից այսպիսի մրցանակի արժանանալը»,- ընդգծել է դոկտոր Տակեո Կանատեն:
Նա նաև նշել է, որ հիացած է Հայաստանով, քանի որ լրջորեն ձեռնամուխ է եղել դառնալու տեխնոարդյունաբերական երկիր:
ՀՀ բարձր տեխնոլոգիական արդյունաբերության նախարարություն
ՀԱՅԵՐԵՆ
Русский
English
Դաս. հայերեն
French
