Այս պահին սահմաններ փակելու կամ ուղեւորահոսքեր սահմանափակելու կարիք չունենք․ նախարարը՝ Չինաստանից տարածվող վիրուսի մասին

22-01-2020 16:58:34   | Հայաստան  |  Ի՞նչ է գրում մամուլը
ՀԺ  Հայաստանի խորհրդարանում սկսվել է ԱԺ-կառավարություն հարց ու պատասխանը։ Գործադիրի անդամներին հարց տալու համար հերթագրվել է 52 պատգամավոր։
 


«Իմ քայլը» խմբակցության պատգամավոր Միքայել Զոլյանի հարցը վերաբերում է
Չինաստանում տարածվող կորոնավիրուսին։ Զոլյանը հիշեցրեց, որ Հայաստանի քաղաքացիներն այսուհետ կարող են առանց մուտքի արտոնագրի մեկնել Չինաստան, եւ հակառակը։ Նա առողջապահության նախարար Արսեն Թորոսյանից հետաքրքրվեց՝ արդյոք մենք ինչ-որ վտանգներ ունենք սրա հետ կապված, եւ եթե հարկ է միջոցներ ձեռնարկել, ապա ինչ է արվում։
 
Նախարար Թորոսյանը պատասխանեց, որ խորությամբ տեղյակ են Չինաստանում տեղի ունեցող իրադարձություններից, ինտենսիվ քննարկումներ եւ հետազոտություններ են ընթանում միջազգային մակարդակով։ ԱՀԿ-ում հատուկ արտակարգ
ռեժիմով հավաք է եղել, որպեսզի որոշեն՝ աշխարհն ինչպես է արձագանքելու այս մարտահրավերին, իսկ գիշերը 10-ին լինելու է հատուկ հայտարարություն, որին հետեւում են․
 
«Մեր մասով տեղի է ունենում ժամանող ուղեւորների ջերմաչափում, արձանագրված դեպքեր չունենք, Չինաստանից դուրս ԱՄՆ-ում է մեկ դեպք արձանագրվել։ Սա հայտնի վիրուսի տեսակ է, բայց ոչ հայտնի ենթատեսակ, այսօր նաեւ դրա նկատմամբ փորձ է արվում վակցինա ստեղծել եւ բուժման միջոց։ Սակայն հատուկ բուժման տեսակ չկա, բուժվում է մնացած վիրուսների պես, դեպքերի զարգացմանը զուգընթաց, եթե կարիք լինի միջոցներ կձեռնարկենք, եթե կարիք լինի կոչ անել ինչ-որ տեսակի վարքագիծ դրսեւորել, կհայտնենք»,- ասաց նախարարը՝ հավելելով, որ այս պահին սահմաններ փակելու կամ ուղեւորահոսքեր սահմանափակելու կարիք չունենք։
 
Թորոսյանը կոչ արեց հետեւել Առողջապահության նախարարության պաշտոնական հայտարարություններին, գանգատների դեպքում անպայման դիմել բժշկի։
 
Չինաստանում տարածվել է նոր վիրուս, այն պատկանում է կորոնավիրուսների ընտանիքին, որում ընդգրկված է նաև SARS-ը կամ Ատիպիկ թոքաբորբը, որի համաճարակի հետևանքով 2002 թվականին վարակվեց մոտ 8000 մարդ, 774-ը մահացան: Նոր վիրուսն արդեն դուրս է եկել Չինաստանի սահմաններից: Արձանագրվել են դեպքեր, երբ Չինաստանից այլ երկրներ ժամանած քաղաքացիներ վարակված են եղել մահաբեր նոր վիրուսով:
Նոյյան տապան   -   Ի՞նչ է գրում մամուլը
Լուրեր Հայաստանից եւ Սփյուռքից

Կարդացել են 260 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար