ԵՐԵՎԱՆ, 29 ՄԱՅԻՍԻ, ՆՈՅՅԱՆ ՏԱՊԱՆ: 2008թ.-ի մարտից մինչեւ այսօր «Մարտի 1-ի» գործերով դատակոչված վկաները անօրինական կերպով տարվում են ոստիկանություն եւ դատախազություն, որտեղ ենթարկվում են խոշտանգումների եւ անմարդկային վերաբերմունքի: Այս մասին նշված է Հելսինկյան ասոցիացիայի միջանկյալ զեկույցում, որն ամբողջովին վերաբերվում է վկաների հանդեպ իրականացված գործողություններին: Մասնավորապես, զեկույցում արձանագրված է, որ 2008թ.-ի մարտի 1-ի հանրահավաքի մասնակից Գագիկ Ավդալյանը մարտի 1-ի լույս 2-ի գիշերը ձերբակալվել է եւ տարվել ոստիկանության 6-րդ վարչություն, որտեղ պահվել է 2 օր: «Մինչ մարտի 4-ի առավոտյան Գ.Ավդալյանը խոշտանգվել է. նա անընդհատ դաժանաբար ծեծի է ենթարկվել 6-10 հոգու կողմից»,- նշված է զեկույցում: Գ.Ավդալյանի անձնագիրը, Հելսինկյան ասոցիացիայի հավաստմամբ, վերցրել են եւ մինչեւ այսօր չեն վերադարձրել: Նրան ստիպել են ցուցմունքներ գրել «մարտի 1-ի» գործով ամբաստանյալներ Մյասնիկ Մալխասյանի եւ Սուրեն Սիրունյանի դեմ` ապառնալով, որ եթե չգրի, ծեծելով կսպանեն եւ կտանեն կգցեն մարտի 1-ի դիակների մեջ եւ կասեն, որ նրանց հետ է մահացել: Ս.Սիրունյանի դատավարության նիստի ժամանակ Գ.Ավդալյանը հրաժարվել է իր նախնական ցուցմունքներից, ինչից հետո ոստիկանները առ այսօր սպառնում են նրան: «Ամբաստանյալ Հակոբ Հակոբյանի գործով դատակոչված վկա Գեւորգ Մուրադյանը մարտի 1-ի դեպքերի կապակցությամբ հայտնել է, որ ընդհանրապես այդ օրը այնտեղ (Ա.Մյասնիկյանի արձանի հարեւանությամբ) չի եղել, հանրահավաքներին չի մասնակցել»,- նշված է զեկույցում: Հ.Հակոբյանի կողմից Գ.Մուրադյանը կոչեր կամ հայտարարություններ չի լսել: Վկան դատարանում հայտարարել է, որ իր նախաքննական ցուցմունքները չեն համապատասխանում իրականությանը: Նա պատմել է, որ իրեն հարցաքննած քննիչը եւ մի քանի ոստիկաններ իրեն ենթարկել են դաժան ծեծի` ստիպելով գրել ցուցմունքներ իրենց թելադրանքով: Վկային երեք օր շարունակ տուն չեն թողել: Ցուցմունքների մեջ Գ.Մուրադյանի ծննդյան տարին եւ ամսաթիվը փոխել են, քանի որ նա այդ ժամանակ անչափահաս է եղել: Նրան, ինչպես նշված է Հելսինկյան ասոցիացիայի զեկույցում, հարցաքննել են առանց ծնողների ներկայության, առանց փաստաբանի, հայտարարելով, թե իրեն պաշտպան չի հասնում: «Գ.Մուրադյանին ծեծելիս ոստիկաններից մեկն ասել է այնպես ծեծեն, որ չմահանա, քանի որ վկան տեղեկացրել է, որ ինքը մանկուց ունի սրտի արատ եւ երիկամային հիվանդություն»,- նշվում է ասոցիացիայի զեկույցում: Զեկույցում ներկայացված են նաեւ վկաներ Ռաֆայել Բալբաբյանի, Հմայակ Գալստյանի, Թաթուլ Կարապետյանի, Յաշա Մելքոնյանի, Խաչիկ Դավթյանի, Հենրիկ Հարթինյանի նկատմամբ կիրարված խոշտանգումների փաստերը: Ինչ վերաբերում է ամբաստանյալ Գրիգոր Ոսկերչյանի գործով վկա Արիստակես Վարդանյանին, ապա նա եւս, մյուս վկաների նման, հրաժարվել է իր նախնական ցուցմունքներից, նշելով, սակայն, որ ինքը բռնության չի ենթարկվել:

---