Համաշխարհային շուկայում ազատվող առնվազն 30 միլիարդ դոլարանոց հատվածը հենց Հայաստանը պետք է զբաղեցնի: Այս խնդիրը կառավարությունը պետք է լուծի առաջիկա հինգ տարվա ընթացքում: 

 

Այս մասին մարտի 24-ին հայ ժողովրդին ուղղված իր ուղերձում հայտարարեց ՀՀ վարչապետ Նիկոլ Փաշինյանը: 

 

Ըստ նրա՝  Արժույթի միջազգային հիմնադրամն արդեն իսկ արձանագրել է, որ 2020 թվականը անկումային է լինելու համաշխարհային տնտեսության համար: Կանխատեսվող անկումն ավելի խորն է լինելու, քան անգամ 2008 -2009 թվականների տնտեսական ճգնաժամի ժամանակ: 

 

«Հայաստանի պարագայում կանխատեսումներն այս պահի դրությամբ դրական են, բայց ակնհայտ է, որ մենք կորցնելու ենք աճի այն տեմպը, որը համատեղ աշխատանքի արդյունքում ձևավորեցինք 2019 թվականին: Բայց ինչպես ասել եմ նախկինում, այս վիճակը մենք ընկալում ենք ոչ թե որպես ողբերգություն, այլ նոր հնարավորություն՝ համաշխարհային տնտեսության մեջ Հայաստանի տեղադիրքը փոխելու, տնտեսական հեղափոխության մեր օրակարգը ավելի արդյունավետ և կրկնապատիկ տեմպերով կյանքի կոչելու համար: Աշխարհում համախառն ներքին արդյունքի 3 տրիլիոն դոլարանոց անկում է լինելու, այսինքն՝ համաշխարահային շուկայում այդքան տեղ է ազատվելու, և մենք պետք է այսօրվանից մեզ տրամադրենք, որ այդ ազատված տեղի առնվազն 30 մլրդ դոլարանոց հատվածը հենց Հայաստանը պետք է զբաղեցնի և այս խնդիրը պետք է լուծվի առաջիկա հինգ տարվա ընթացքում»,- ընդգծեց Ն. Փաշինյանը՝ հավելելով. «Սա նշանակում է, որ Հայաստանի կառավարությունը խնդիր է դրել զբաղեցնել ազատվող շուկայի 1 տոկոսը, և ես հավատում եմ, որ դա մենք կարող ենք անել»: 

 

Նրա պնդմամբ՝  այսօր ամբողջ աշխարհը հիացած է հայ գործարարի տաղանդով, քանի որ հենց նրա շնորհիվ կորոնավիրուսի ամենաճգնաժամային պահին Հայաստանը պարենային և լայն սպառման ապրանքների որևէ դեֆիցիտ չի ունեցել և չունի. 

 

«Այսպիսի արդյունքով չեն կարող պարծենալ աշխարհի շատ ու շատ զարգացած երկրներ, և սա մեր գործարարների, աշխատող հայ մարդու տաղանդի շնորհիվ է»: 

 

Վարչապետը նաև տեղեկացրեց, որ հստակ քայլեր են մշակել տեղական բիզնեսի մրցունակ և հեռանկարային հատվածին աջակցելու համար, իսկ այդ աջակցության առաջին փաթեթները կընդունվեն հինգշաբթի օրը կայանալիք կառավարության նիստում: 

 

«Ընդհանուր առմամբ՝ կառավարությունը շուրջ 150 մլրդ դրամ է տրամադրելու իրականում ոչ թե ճգնաժամային այս վիճակին դիմակայելու, այլ հետճգնաժամային աշխարհում մեր հաղթանակները նախապատրաստելու համար: Կառավարության առաջիկա նիստում մենք կընդունենք նաև գյուղատնտեսության խթանման լայնածավալ ծրագիր: Ինչպես և խոստացել էի, բոլոր տեսակի նոր տրամադրվող գյուղատնտեսական վարկերի տոկոսները կառավարության կողմից կզրոյացվեն, ինչպես նաև առանձնահատուկ պայմաններ կստեղծվեն ռեալ աշխատող և ձևավորվող գյուղատնտեսական կոոպերատիվների համար: Իմիջայլոց՝ գյուղատնտեսական գործունեությունն այս օրերին չպետք է արգելակվի, և ես կոչ եմ անում մեր բոլոր գյուղացիներին ակտիվորեն զբաղվել գարնանային գյուղատնտեսական աշխատանքներով, որովհետև նաև Պարետատան որոշմամբ՝ գործունեության այդ տեսակը համարվել է կենսական»,- փաստեց Ն. Փաշինյանը: 

 

Նրա փոխանցմամբ՝ կառավարության առաջիկա նիստում նաև հատուկ փաթեթ կընդունվի գործող բիզնեսների լիկվիդայնության հնարավոր խնդիրները չեզոքացնելու և անհրաժեշտ լիկվիդայնություն ապահովելու, այդ թվում աշխատատեղերը պահպանելու և աշխատավարձերը վճարելու համար: 

 

 

 

 

 

 

 

Էլիզա Զախարյան, «Նոյյան Տապան» 

Նոյյան տապան  -   Հասարակություն