«Բարգավաճ Հայաստան» կուսակցության նախընտրական ծրագրով
նախատեսվում է Երեւանի շուրջ կառուցել օղակաձեւ ավտոճանապարհ
11-05-2009 18:30:00 | Հայաստան | Քաղաքական
ԵՐԵՎԱՆ, 11 ՄԱՅԻՍԻ, ՆՈՅՅԱՆ ՏԱՊԱՆ: «Անհրաժեշտ է վերջ տալ
Երեւանի թամանյանական ոգով կառուցված բնակելի, մշակութային,
կրթական, հասարակական եւ այլ բնույթի շենքերի կամայական,
մայրաքաղաքի ճարտարապետական դեմքը խեղաթյուրող, անճաշակ
փոփոխություններին ու ինքնակամ կառուցապատմանը»,- ասված է
«Բարգավաճ Հայաստան» կուսակցության նախընտրական ծրագրի
«քաղաքաշինություն» բաժնում: ԲՀԿ-ն գտնում է, որ Երեւանի ավագանու
ընտրությունների արդյունքում ձեւավորվելիք մայրաքաղաքային
իշխանությունը պետք է ջանք չխնայի շինարարական ցանկացած նախագիծ
միմիայն Երեւանի գլխավոր հատակագծին համապատասխան իրականացնելու
հարցում:
ԲՀԿ-ն խոստանում է մոտ ապագայում իրականացնել 4-րդ աստիճանի
վթարային շենքերի քանդման հետեւանքով բնակտարածությունից զրկված
բնակիչների համար բնակելի շենքերի շինարարություն եւ
վերակառուցում, նաեւ իրականացնել 3-րդ աստիճանի վթարայնության
բազմաբնակարան շենքերի վերականգնման-ամրացման աշխատանքներ: Բացի
այդ, կուսակցությունը նախատեսում է Երեւանի շուրջ կառուցել
օղակաձեւ ժամանակակից բարեկարգ ավտոճանապարհ` այն նկատառումով, որ
հանրապետության հյուսիսային տարածաշրջաններից դեպի հարավ գնացող եւ
հատկապես բեռնատար ավտոմեքենաները շրջանցեն մայրաքաղաքը: