Րաֆֆի Հովհաննիսյանը վերջնականապես հրաժարվել է մասնակցել
ԵԽԽՎ-ի եւ ՆԱՏՕ-ի խորհրդարանական վեհաժողովի աշխատանքներին
09-04-2009 17:30:00 | Հայաստան | Քաղաքական
ԵՐԵՎԱՆ, 9 ԱՊՐԻԼԻ, ՆՈՅՅԱՆ ՏԱՊԱՆ: «Ժառանգություն»
կուսակցության հիմնադիր առաջնորդ Րաֆֆի Հովհաննիսյանը
վերջնականապես հրաժարվել է մասնակցել Եվրոխորհրդի խորհրդարանական
վեհաժողովի (ԵԽԽՎ) աշխատանքներին: Այս մասին ապրիլի 9-ի ասուլիսում
հայտնեց Հայաստանի Ազգային Ժողովի «Ժառանգություն» խմբակցության
ղեկավար Արմեն Մարտիրոսյանը: Նրա խոսքերով, կուսակցությունն ԱԺ-ի
նախագահին առաջարկել է Ր.Հովհաննիսյանի փոխարեն ԵԽԽՎ-ի հայկական
պատվիրակության կազմում ընդգրկել խմբակցության անդամ Զարուհի
Փոստանջյանին, իսկ ՆԱՏՕ-ի խորհրդարանական վեհաժողովում`
խմբակցության քարտուղար Ստեփան Սաֆարյանին:
«Ժառանգության» մամլո խոսնակ Հովսեփ Խուրշուդյանն իր հերթին
նշեց, որ իր այդ որոշմամբ Ր.Հովհաննիսյանը կատարում է դեռեւս
2008թ.-ի հունիսին հանրությանը տված խոստումը, ըստ որի, եթե
Հայաստանն ու Եվրոպան հավատարիմ չլինեն իրենց որդեգրած
ժողովրդավարական արժեքներին, ապա ինքը կադադարեցնի իր
համագործակցությունը այդ եվրոկառույցների հետ:
Ա.Մարտիրոսյանը հավելեց, որ Հայստանում առկա
հասարակական-քաղաքական վիճակն անընդունելի է «Ժառանգության» համար:
Նրա խոսքերով, անթույլատրելի է հատկապես այն հանգամանքը, որ անգամ
Քրեական օրենսգրքի 225 եւ 300 հոդվածների փոփոխությունից հետո
քաղբանտարկյալները շարունակում են մնալ անազատության մեջ:
ԱՆդրադառնալով Ր.Հովհաննիսյանի հետագա ծրագրերին,
Ա.Մարտիրոսյանը հերքեց որոշ լրատվամիջոցների տարածած այն լուրը, թե
«Ժառանգության» առաջնորդը պատրաստվում է հեռանալ մեծ
քաղաքականությունից: Ըստ նրա, ԱԺ-ի միակ ընդդիմադիր ուժի առաջնորդը
հանդիսացող, բարձր վարկանիշ ունեցող Ր.Հովհաննիսյանը պարզապես չի
կարող չզբաղվել ակտիվ քաղաքականությամբ: