Արծրունի խոստացած անակնկալը. սահմաններ այլեւս չկան

02-11-2020 14:55:44   | Հայաստան  |  Վերլուծություն
Հայաստանի ՊՆ ներկայացուցիչ Արծրուն Հովհաննիսյանը նախօրեին ավանդական ճեպազրույցում պատասխանելով հարցերի, նշել էր, որ չի կարող ասել, թե ռազմաճակատի հատկապես որ ուղղությամբ է եղել թուրքական հատուկջոկատայինների կիրառումը, բայց տեղեկությունների վերջնական ամփոփման պարագայում թշնամուն այդ մասով սպասվում է անակնկալ:
 


Արցախի դեմ թուրքական ագրեսիայի կազմակերպման, կառավարման եւ իրականացման գործում հենց Թուրքիայի ներկայացուցիչների ներգրավման մասին հետախուզական տվյալներ ներկայացրեց ռուսական մամուլը: Ռուսական ռազմական շրջանակներին առնչվող Տելեգրամ ալիքները տարածեցին տեղեկություն, որ Թուրքիան 1200 հատուկջոկատային է ուղարկում Ադրբեջան՝ Արցախի դեմ նետելու համար: Ըստ այդ ալիքների, թուրքական եւ ադրբեջանական զինվորականության միջեւ առաջանում են հակադրություններ, քանի որ թուրքերը մեղադրում են ադրբեջանցիներին, որ չեն կարողանում լավ կռվել եւ ստիպված են ներգրավել թուրք զինվորների:
 
Ռազմաճակատային տապալումները Անկարային ստիպում են ավելի
ու ավելի ընդլայնել ներգրավվածությունը, ինչը նշանակում է, որ ավելի ու ավելի դժվար է լինելու թաքցնել այն, հարկադրելով թուրքերին բացվել:
 
Ըստ ամենայնի, հենց այդ համատեքստում է Արծրուն Հովհաննիսյանի խոստացած անակնկալը: Չփորձենք մանրամասնել, թե ինչպիսին կարող է լինել այն: Հաստատ Հայաստանի ՊՆ ներկայացուցչի խոսքերի մանրամասն դիտարկում անում են նաեւ թուրքերը, փորձելով կռահել, թե ինչ անակնկալի մասին է խոսում հայկական կողմը:
 
Դիտարկման արժանի է, որ այդ մասին խոսակցությունը ծավալվում է ՌԴ նախագահին Հայաստանի վարչապետի նամակի ֆոնին, որում Երեւանն առաջարկում է Մոսկվային սկսել ռազմական օգնության տեսակի եւ ծավալի վերաբերյալ «անհապաղ խորհրդակցություն», ինչպես նախատեսված է հայ-ռուսական ռազմական փոխօգնության պայմանագրով:
 
Մոսկվան հայտարարել է, որ մանրամասները քննարկվելու են: Անկախ նրանից, թե ինչպիսին են լինելու դրանք, խոսքը Մոսկվայի ռազմա-քաղաքական դերի առնվազն մեկ շոշափելի աստիճան բարձրացման մասին է, եթե անգամ դա տեղի
է ունենում ՀՀ սահմանի շրջանակում:
 
Թուրքիայի սանձազերծած պատերազմը գործնականում սահման չի ճանաչում, եւ բավական է հիշել հայկական կողմի հայտարարությունն օրինակ այն մասին, որ Ադրբեջանի տարածքից թուրքական օդային գործողությունները Անկարան կառավարում է Թուրքիայի տարածքում օդային հրամանատարական կետից: Այդ իմաստով, հինգերորդ սերնդի պատերազմում սահմաններ այլեւս չկան:
 
 
 
Նոյյան տապան   -   Վերլուծություն
Լուրեր Հայաստանից եւ Սփյուռքից

Կարդացել են 2534 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար



Բաժանորդագրվեք «Նոյյան Տապան»-ի մեր էջերին«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար