ԵՐԵՎԱՆ, 20 ՄԱՐՏԻ, ՆՈՅՅԱՆ ՏԱՊԱՆ: «Մարիոթ-Արմենիա» հյուրանոցային համալիրում մարտի 20-ին տեղի է ունեցել «Արցախ ՀԷԿ» ԲԲԸ-ի արժեթղթերի տեղաբաշխման շնորհանդեսը, որին մասնակցել են ՀՀ վարչապետ Տիգրան Սարգսյանն ու ԼՂՀ վարչապետ Արա Հարությունյանը: Ինչպես «ՆՈՅՅԱՆ ՏԱՊԱՆ»-ին հայտնեցին ՀՀ կառավարության Տեղեկատվության եւ հասարակայնության հետ կապերի վարչությունից, ընկերության կողմից թողարկվող արժեթղթերի տեղաբաշխումն իրականացնում է «Արմենբրոկ» ԲԲԸ-ն: «Արցախ ՀէԿ» ընկերությունը նպատակ ունի բաժնետոմսերի տեղաբաշխումից հավաքագրված միջոցներն ուղղել ԼՂՀ-ում մի քանի նոր հիդրոէլեկտրակայանների կառուցմանը: Տ.Սարգսյանի խոսքերով, նախաձեռնությունը խորհրդանշական է ոչ միայն այն պատճառով, որ համաշխարհային ֆինանսական եւ տնտեսական ճգնաժամի պայմաններում կազմակերպվում են նման միջոցառումներ, այլեւ, որ այն կարող է նոր սկիզբ հանդիսանալ ֆինանսական շուկայի ակտիվացման եւ դրա արդյունքում` տնտեսության խթանման համար: Վարչապետը նշել է նաեւ ներդրողների համար ներկայացվող նախագծի գրավչությունը, ենթակառուցվածքների զարգացմանն աջակցելու կարեւորությունը, ինչը կնպաստի ԼՂՀ-ում նոր աշխատատեղերի ստեղծմանն ու տնտեսական աճի հնարավորությունների մեծացմանը:

---