ԵՐԵՎԱՆ, 9 ՓԵՏՐՎԱՐԻ, ՆՈՅՅԱՆ ՏԱՊԱՆ: «Հայաստանում երեխաների իրավունքների խախտումների վերաբերյալ բողոքներ չեն ստացվում, պաշտոնական վիճակագրություն չունենք, եւ սա վկայում է այն մասին, որ վիճակը իրոք պրոբլեմային է, որովհետեւ եթե ընդհանրապես բողոք չի լինում, սա ճիշտ հակառակի մասին է խոսում»,- «Երեխայի իրավունքներին առնչվող ՀՀ օրենսդրությունում առկա խնդիրների վերաբերյալ» ՀՀ մարդու իրավունքների պաշտպանի արտահերթ հրապարակային զեկույցի շրջանակներում փետրվարի 9-ին կազմակերպված խորհրդարանական ընդլայնված լսումներում ասաց զեկույցի հեղինակ Արմեն Հարությունյանը: Նա նշեց, որ պետությունը պետք է որոշակի միջոցներ ձեռնարկի ընտանիքի նկատմամբ: Ըստ Ա.Հարությունյանի, դա օրգանապես կապված է երեխայի իրավունքների հետ, որովհետեւ երեխան ձեւավորվում է որոշակի միջավայրում, որից առաջնայինը հենց ընտանիքն է: Զեկույցում բարձացված խնդիրները հիմնականում ուրվագծվել են բնակչությունից ստացված բողոքների եւ Մարդու իրավունքների գրասենյակի կողմից իրականացված մոնիտորինգի հիման վրա: Դրանց լուծման նպատակով առաջարկվում է ընդունել նոր օրենքներ, նաեւ վերացնել գործող օրենսդրության բացթողումներն եւ հակասությունները: Մասնավորապես, անհրաժեշտ է վերանայել ալիմենտի մեկնարկային ցածր չափը, մինչեւ 2 տարեկան երեխայի խնամքի համար նպաստի նշանակման կարգը: Ինչպես նշեց Ա.Հարությունյանը, ներկայումս նպաստը տրվում է միայն աշխատող ծնողին, որը գտնվում է արձակուրդում: Մինչդեռ նպաստը տրվում է երեխայի համար, եւ, ըստ պաշտպանի, սխալ է աշխատող ու չաշխատող ծնողների միջեւ տարբերություն դնելը, հատկապես, որ շատ դեպքերում ծնողը չի աշխատում օբյեկտիվ պատճառներով, այլ ոչ իր մեղքով:

---