2008թ.-ի դեկտեմբերին Հայաստանում պարենային ապրանքների գները
0,8%-ով աճել են
08-01-2009 18:36:00 | Հայաստան | Տնտեսություն
ԵՐԵՎԱՆ, 8 ՀՈՒՆՎԱՐԻ, ՆՈՅՅԱՆ ՏԱՊԱՆ: 2008թ.-ի դեկտեմբերին
նոյեմբերի համեմատ Հայաստանում գրանցվել է պարենային ապրանքների
0,8% գնաճ, ինչը մեծապես պայմանավորվել է դիտարկվող պարենային 13
ապրանքախմբերից 8-ում գրանցված 0,1-18,1% գնաճով:
ՀՀ Ազգային վիճակագրական ծառայության տվյալներով, բանջարեղենի
եւ կարտոֆիլի ապրանքախմբում 2008թ.-ի դեկտեմբերին նոյեմբերի
համեմատ գրանցվել է 18,1% գնաճ, իսկ 2007թ.-ի դեկտեմբերի համեմատ`
11,9% գնանկում: 2008թ.-ի դեկտեմբերին նոյեմբերի համեմատ
հանրապետությունում արձանագրվել է լոլիկի (1,9 անգամ), վարունգի
(41,5%), կաղամբի (40%), ճակնդեղի (12,7%), գազարի (8,1%),
ծաղկակաղամբի (7,9%), գլուխ սոխի (4,7%) գնաճ: Կարտոֆիլի եւ սխտորի
գները նշված ժամանակահատվածում նվազել են, համապատասխանաբար, 4,1%
եւ 0,2%-ով:
2008թ.-ի դեկտեմբերին նոյեմբերի համեմատ մրգի ապրանքախմբում
արձանագրվել է 13,1% գնաճ, իսկ 2007թ.-ի դեկտեմբերի համեմատ` 9,8%
գնանկում: 2008թ.-ի դեկտեմբերին նոյեմբերի համեմատ
հանրապետությունում արձանագրվել է խնձորի (5%), տանձի (6,8%), նռան
(16,8%), արքայանարնջի 18%, խաղողի (20,0%) գնաճ: Միաժամանակ,
27,8-11,2%-ով նվազել են նարնջի, մանդարինի, կիտրոնի գները:
Ձվի միջին հանրապետական գինը 2008թ.-ի դեկտեմբերին նոյեմբերի
համեմատ աճել է 2,4%-ով: 2008թ.-ի դեկտեմբերին նոյեմբերի համեմատ
հանրապետությունում արձանագրվել է ձկնամթերքի 1,1% գնաճ: Մսամթերքի
ապրանքախմբում 2008թ.-ի դեկտեմբերին նոյեմբերի համեմատ գրանցվել է
0,1%, իսկ 2007թ.-ի դեկտեմբերի համեմատ` 9,1% գնաճ: 2008թ.-ի
դեկտեմբերին նոյեմբերի համեմատ հանրապետությունում արձանագրվել է
խոզի մսի 4,5% գնաճ, իսկ ոչխարի եւ տավարի մսի գները նշված
ժամանակահատվածում նվազել են, համապատասխանաբար, 1,7%-ով եւ
1,2%-ով:
Ոգելից խմիչքի եւ ծխախոտի, հրուշակեղենի, կաթնամթերքի,
սուրճի, թեյի, կակաոյի ապրանքախմբերում 2008թ.-ի դեկտեմբերին
նոյեմբերի համեմատ արձանագրվել է 0,1-0,7% գնաճ, իսկ ոչ ոգելից
խմիչքի ապրանքախմբում գների մակարդակը նախորդ ամսվա համեմատ մնացել
է անփոփոխ:
2008թ.-ի հունվար-հոկտեմբերին հացամթերքի ապրանքախմբում
գրանցված 16,9% գնաճին նոյեմբեր-դեկտեմբերին հաջորդել է 7,7%
գնանկում, ընդ որում, դեկտեմբերին նոյեմբերի համեմատ գները նվազել
են 3,5%-ով: Վերջինիս մեծապես նպաստել է ալյուրի (6,1%),
հացահատիկի (4,4%), բարձր տեսակի հացի (4%) գնանկումը: Բրնձի,
առաջին տեսակի հացի, մակարոնեղենի, հնդկացորենի, լավաշի, ձավարի
գները նշված ժամանակահատվածում նվազել են 2,2-0,2%-ով: 2008թ.-ի
հունվար-հունիսին ալյուրի հանրապետությունում գրանցված 20,4%
ընդհանուր գնաճից հետո հուլիս-դեկտեմբերին արձանագրվել է 14,8%
գնանկում: 2008թ.-ի հունվար-սեպտեմբերին արձանագրված հացատեսակների
15% ընդհանուր գնաճին հոկտեմբեր-դեկտեմբերին հաջորդել է 8,5%
ընդհանուր գնանկում:
Կենդանական եւ բուսական յուղի ապրանքախմբում 2008թ.-ի
դեկտեմբերին նոյեմբերի համեմատ գրանցվել է 1% գնանկում, ինչը
մեծապես պայմանավորվել է արեւածաղկի յուղի (2,5%) եւ կարագի (1,2%)
գնանկումով: Նշված ժամանակահատվածում հանրապետությունում
արձանագրվել է այլ (հալած) յուղերի եւ մարգարինի 0,2-1,1% գնաճ:
Այլ մթերքի, շաքարավազի գները 2008թ.-ի դեկտեմբերին նոյեմբերի
համեմատ նվազել են 0,2%-ով: