Հայաստանի պետական ակադեմիական երգչախումբը 2009 թվականին
հյուրախաղերի կմեկնի Ամերիկա
29-12-2008 23:00:00 | Հայաստան | Մշակույթ
ԵՐԵՎԱՆ, 29 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի պետական
ակադեմիական երգչախմբի համար 2008 թվականը անցել է հետաքրքիր ու
բազմազան համերգային ծրագրերով ու հյուրախաղերով: Երգչախմբի
վաստակաշատ գեղարվեստական ղեկավար եւ գլխավոր դիրիժոր Հովհաննես
Չեքիջյանը դեկտեմբերի 29-ին «Տեսակետ» ակումբում լրագրողների հետ
համդիպման ժամանակ, մասնավորապես, առանձնացրեց 1988 թվականի ավերիչ
երկրաշարժի զոհերի հիշատակին նվիրված համերգը, ուր երգչախումբը
հանրահայտ Վլադիմիր Սպիվակովի ղեկավարությամբ կատարեց Մոցարտի
«Ռեքվիեմ»-ը: Մաեստրո Չեքիջյանը փաստեց, որ 48 տարի շարունակ իր
ղեկավարությամբ գործող պետական ակադեմիական երգչախմբում տիրում է
ստեղծագործական համերաշխություն: Իսկ օրեր առաջ, մաեստրոյի
խոսքերով, երգչախումբը իր ծննդյան 80-ամյակի կապակցությամբ մեծ
հաջողությամբ կատարել է Բեթհովենի 9-րդ սիմֆոնիան:
Պրն. Չեքիջյանը նշեց նաեւ, որ իր կյանքում շատ են եղել
դժվարություններ, սակայն ինքը դրանք միշտ հաղթահարել է: «Փշոտ
ճանապարհները միշտ շատ են եղել, այսօր էլ կան, բայց քանի որ ես
մարտնչող եմ, միշտ էլ պատվով եմ դուրս եկել»,- ասաց նա:
Գալիք տարի Հայաստանի պետական ակադեմիական երգչախումբը
հյուրախաղերի կմեկնի Ամերիկա, որի ճանապարհածախսը խոստացել է հոգալ
մշակույթի նախարարությունը:
Մաեստրոն, անդրադարձ կատարելով խորհրդային տարիներին, նշեց,
որ այն ժամանակ պետությունը լիովին ապահովում էր երգչախմբի
գոյատեւումը, սակայն այսօր այլ է իրավիճակը. «չունենք ջեռուցում,
չունենք փորձատեղի, չունենք բավարար աշխատավարձ եւ սրանցից բխող
բազում այլ բաներ»,- ասաց Հ.Չեքիջյանը: